Përmbytjet, nis faza e dytë. Rama: Kompensim për të dëmtuarit, përparësi hapja e shkollave

Kryeministri Edi Rama ka mbledhur Komitetin e Emergjencave Civile, ku pasi është bërë një bilanc i përmbytjeve, deklaroi se tani do të nis faza e dytë, ajo e kapërcimit të pasojave në infrastrukturë, familje e biznese.

“Faza e dytë është ajo e kapërcimit të pasojave për familjet e prekura dhe për ato pjesë së infrastrukturës që janë jetike për vazhdimin e jetës normale në komunitetet e përmbytura.

Do na duhet që të ecim më tej me zbatimin e planit që ka nisur nga ana e Ministrit të Bujqësisë për të ndërhyrë në të gjitha pikat e dobëta dhe të rrezikuara nga uji. Shembja e një numri të konsiderueshme ujërash tregon përmasat katastrofike që kjo situatë kishte. E kemi parë që ka akoma disa pika të dobëta dhe problematike në vend, duhet që të bëjmë një sërë ndërhyrjesh të tjera për mbrojtjen më afatgjatë të shtratit të lumenjve, dhe për mbjelljen me përparësi të pemëve në të gjitha ato zona ku dëmtimi i hapësirave të gjelbërta ka shkaktuar erozion. 65 ura janë dëmtuar nga përmbytjet, ndërsa 27 shkolla ende nuk kanë filluar mësimi.

Përparësi hapjes së shkollave që tani janë të mbyllura nga dëmtimet. Qytetarët dhe biznesmenët duhet që të marrin masat dhe të sigurohen si në të gjitha vendet e siguruara që të dëmshpërblehen në këto raste të fatkeqësive natyrore. Ne do të bëjmë çfarë është e mundur, për të përmbushur detyrimet tona”, u shpreh Edi Rama.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.