“Përmbytjet, situata nën kontroll”, Çako: Strukturat përkatëse janë në terren për të shmangur përkeqësimin e situatës

Situata e e përmbytjeve në vend e shkaktuar nga reshjet e fundit është nën kontroll. Kështu ka deklaruar për televizionin Scan, Haki Çako,  drejtori i përgjithshëm i emergjencave civile. Çako shtoi se strukturat përkatëse janë në terren duke punuar për të shmangur përkeqësimin kryesisht në zonat më problematike, nga reshjet e vazhdueshme të shiut:

“Situata është në  kontroll. Jemi duke mbikëqyrur me vëmendje ngarkesën e basenit të lumit Drin, në të treja basenet e saj si dhe varianti teknik i Plotave ose më saktë Komiteti Kombëtar për Digat dhe Plotat është duke mbikëqyrur dhe duke marrë vendime hap as hapi por deri në këtë moment situata është stabël.”

Sipas kreut të emergjencave civile, orët e fundit nuk janë bërë më evakuime të familjeve:

Janë vakuar 42 familje, ndërsa 49 banesa kanë prezencën e ujit, por jo për të rrezikuar banorët dhe për të cenuar jetën normale të tyre, ndërkohë që ka prezencë në të gjitha zonat ku ka vështirësi të Forcave të Armatosura, të Policisë së Shtetit dhe të gjitha forcave të tjera të sistemit të mbrojtës civile si Njësitë e Mbrojtjes së Zjarrit dhe Kërkim-Shpëtimit. Me siguri të plotë mund të themi se nuk kemi asnjë familje të rrezikuar apo në vështirësi ekstreme.”

Çako u ndal edhe në situatën  aktuale të qarqeve  më të prekura:

“Është Lezha dhe Shkodra. Janë zonat më të ekspozuara. Lezha për shkak të grumbullimit të ujërave nga zona e Zadrimes dhe të Kallmetit, ku edhe nuk kanë munguar dëmet e shkaktuara nga prezenca e ujit dhe shirat e rëna, në dëmtimin e rrugëve dhe urave ku është ndërhyrë dhe punohet intensivisht, si për krijimin e bypass-eve por edhe në ngritjen dhe ndërtimin e urave ku mund të përmend atë të Kalivaçit ku ndodhen prej ditësh Forcat e Armatosura.”

Prej ditësh vendi ndodhet  në vështirësi për shkak të intensitetit të lartë të reshjeve duke mbuluar  me ujë banesa dhe hektarë të tërë tokë bujqësore,  kryesisht në qarkun Shkodër dhe Lezhë.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.