Përmirësimi i sistemit TIMS brenda tre muajsh- Investim prej 39.7 mln lekësh për pajisje të reja
39.7 milionë lekë do të investohen në përditësimin e kapaciteteve të sistemit të menaxhimit ndërkombëtar të hyrje-daljeve të shtetasve, TIMS.
Ky është rezultati i tenderit të hapur nga Policia e Shtetit, fituar nga operatori “S&T Albania”. Në garë morën pjesë edhe tre kompani të tjera, por asnjë prej tyre nuk ka paraqitur një ofertë ekonomike, duke u skualifikuar për rrjedhojë.
Investimi përfshin blerjen e një disa pajisjeve për menaxhimin e rrjetit, si: dy servera databazash dhe një sërë pajisjesh të tjera teknologjike, së bashku me shërbimin e backup-it dhe instalimit.
Ndërhyrja u konsiderua kritike nga ana e Policisë, për shkak se ngarkesa nga viti në vit është në rritje, së bashku me numrin e transaksioneve që TIMS operon në njësinë e kohës.
Krahas volumit të punës në periudha normale, trafiku i lartë i veprimeve në stinën e verës nga të gjitha pikat e kalimit kufitar, si edhe pajisjet në prag amortizimi kanë krijuar në të shkuarën bllokime të sistemit, duke shkaktuar radhë të gjata dhe pakënaqësi mes shtetasve që hyjnë apo dalin nga vendi ynë.
Struktura e re pritet të vihet në operim brenda 12 javësh nga data e nënshkrimit të kontratës me kompaninë fituese dhe do të ndikojë direkt në ofrimin e shërbimit pa ndërprerje, në një procesim më të shpejtë të informacionit dhe raportim real pranë përdoruesve dhe strukturave përkatëse.
Financimi i këtij projekti do të jetë i ndarë në dy vite, ku për vitin 2017 do të vihet në dispozicion fondi prej 12.5 milionë lekësh, ndërsa pjesa tjetër do të jepet në vitin 2018.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.