Përmirësohen shërbimet e UKT, Veliaj: Qytetarët të shfrytëzojnë Shkurtin për të lidhur kontratat e reja
Ujësjellës-Kanalizime Tiranë ka përmirësuar shërbimet për qytetarët duke u mundësuar atyre që ta kenë më të lehtë pagesën e faturës së ujit në të gjitha bankat dhe agjencitë alternative të pagesave, përmes një procesi transparent në faturim, leximin e matësit përmes fotografisë dhe ndërveprimit të menjëhershëm me sistemin.
Kreu i Bashkisë së Tiranës Erion Veliaj, i shoqëruar nga Përfaqësuesja e USAID në Shqipëri, Catherine Johnson, përuruan Dhomën e Serverave të UKT dhe softuerit të ri, i cili do të sjellë përmirësim në monitorimin e të gjitha depove kryesore, sistemin Scada dhe menaxhimin e impiantit të Bovillës.
“Kemi bashkuar energjitë dhe financat tona, për t’i siguruar UKT dhomën më të sofistikuar të serverëve. Ky është një investim afatgjatë, për t’u siguruar që jo vetëm rrjeti i ujit zhvillohet, por edhe rrjeti i teknologjisë, i informacionit dhe i gjithë databazës sonë dhe gjithashtu mban hapin e investimeve në Ujësjellës. Më vjen mirë që falë ndihmës shumë bujare të USAID-it, kemi investuar rreth 1 milionë dollarë për këtë dhomë serverash, duke kthyer ujësjellësin e Tiranës nga epoka e letrës së bakallit, në një sistem të sofistikuar që mbledh jo vetëm faturat e ujit, por edhe taksat e Bashkisë”, tha Veliaj.
Kryebashkiaku u bëri apel qytetarëve që të shfrytëzojnë zgjatjen e afatit, t’i përgjigjen thirrjes për rikthimin e ligjshmërisë në konsumin e ujit të pijshëm.
“Kush ka vendosur të jetojë në Tiranë, ka pranuar se këtu i respektojmë rregullat, kontratat shtetërore. Në Tiranë, nuk do të vjedhim pronën publike dhe ashtu si mbi 90% e popullsisë së Tiranës, e cila i paguan të gjitha faturat e detyrimet, besoj se edhe ai 10% që ka mbetur, në vend që të penalizohet, do të ofrohet vetë vullnetarisht”, deklaroi Veliaj.
Ky projekt synon përmirësimin e mbledhjes dhe ruajtjes së të dhënave dhe i faturimit të konsumatorëve.
Më parë sistemi i faturimit përpunohej nga një aplikacion me programim të vjetëruar, i cili ishte i paharmonizuar dhe krijonte vështirësi për njehsimin e të dhënave dhe shërbimeve të tjera.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.