Përmirësohet demokracia në Shqipëri – Freedom House: Por, drejtësia vijon të jetë e mangët dhe e korruptuar
Freedom House vazhdon ta klasifikojë Shqipërinë si një vend në trazicion dhe me regjim hibrid sa i përket nivelit të demokracisë. Por, vendi ynë ka pësuar një përmirësim të lehtë në indeksin e demokracisë që është edhe shtylla bazë e raportit, nga 4.14 pikë një vit më parë, në 4.11 pikë këtë vit, në një pikëzim nga 1 në 7, ku 1-shi i referohet performancës më të mirë dhe 7-a performancës më të keqe.
Kjo vjen si pasojë e një fushate më të qetë elektorale se zakonisht, gjatë zgjedhjeve të 2017-ës, thuhet në raport, ndërkohë që të gjithë indikatorët e tjerë nuk kanë lëvizur në krahasim me një vit më parë.
Me tone pozitive ndërkohë vlerësohen përpjekjet e qeverisë për luftën ndaj korrupsionit dhe ryshfetit në administratën publike e sidomos në policinë e shtetit. Por ndërkohë, përmenden edhe rastet e përfshirjes së ish-ministrit të brendshëm në një skandal si dhe zgjedhja e prokurores së përgjithshme me votat vetëm të mazhorancës.
Sa i përket korrupsionit, Freedom House thotë se, lufta e qeverisë është përqendruar më shumë mbi administratën, duke lënë pas dore korrupsionin në politikë dhe si dhe atë në bashkëpunim mes privatit dhe publiku, siç është edhe kapja e shtetit. Edhe në drejtim të gjyqësorit vihen re kritika të shumta, si në drejtim të korrupsionit dhe mungesës së eficencës, ashtu edhe në drejtim të vonesave në krijimin e organeve të reja të drejtësisë.
Sa i përket projeksioneve për 2018-ën, Freedom House vlerëson përmirësimin e qeverisjes dhe mundësinë për reforma të thella, por nuk harron pa përmendur tendencat në rritje të autoritarizmit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.