Përplasje në Komisionin e Mediave – Vokshi: Latë 35 mijë nxënës pa dëftesa. Nikolla: Në Prokurori
Çështja e dëftesave të arsimit parashkollor ka shkaktuar përplasje të ashpra mes Albana Vokshit, Kryetare e Komisionit Parlamentar të Medias dhe Ministres së Arsimit Lindita Nikolli. Vokshi akuzoi se 35 mijë nxënës kanë mbetur pa dëftesa, pasi ato kanë pasur gabime, shkak për të cilin fëmijëve u është thënë se do t’i tërheqin në shtator.
“Dëftesë lirimi, e kemi denoncuar, e kanë denoncuar deputetët e partisë, që sikurse e shihni juve ju mungojnë numrat. Po ashtu e keni çuar nëpër shkolla, e vërtetuar nga gjithë mësuesit, i keni detyruar mësuesit që të lënë pushimet dhe të vijnë në shkolla, në shkelje të kontratës së sapofirmosur kolektive. Dhe më tej i keni urdhëruar që të kthehen mbrapsht të gjithë dëftesat, 35 mijë ose më shumë dëftesa lirimi për të cilat dikush duhet të mbajë përgjegjësi. Po ashtu keni mashtruar kur keni thënë që dëftesat janë shpërndarë”, akuzoi Vokshi.
Nikolla i konsideroi shpifje akuzat e Vokshit, dhe tha se i ka dërguar deklaratat e demokrates në prokurori. Ajo pranoi se ka pasur gabime me dëftesat, por nënvizoi se po pajisen rregullisht me diploma gjimnazistët të cilëve ato u nevojiten për të studiuar jashtë shtetit.
“Dëftesat që lidhen me certifikatat e maturantëve dhe diplomat që kanë shprehur vullnetin për të studiuar jashtë shtetit, nuk ka asnjë pengesë, janë shpërndarë dhe të rimarra. Problematika që doli me dëftesën që zoti deputet e komunikoi në rrjetet sociale, unë jam përgjigjur, madje duke i thënë dhe faleminderit. Ishte një gabim teknik i kapur edhe nga ne. Është bërë korrigjimi, ka filluar shpërndarja nëpër shkolla”, u shpreh Nikolla. “Kush mban përgjegjësi?”, ndërhyri Vokshi. “Nuk e ndan ti përgjegjësinë. I jam drejtuar prokurorisë për një akuzë që më është bërë publike dhe padyshim do t’i shkoj deri në fund që histori të tilla nuk mund të jenë historia e njerëzve që punojnë me ndershmëri me mish e me shpirt”, tha ministrja.
Ministrja e Arsimit Nikolla ishte të martën në Komisionin e mediave për të diskutuar mbi disa ndryshime në ligjin “Për sistemin arsimor parauniversitar”.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.