“Përplasjet” biznes-konsumator, Shteti ndërmjetës – Financat Krijojnë Drejtorinë e Përgjithshme për Zgjidhjen Alternative të Mosmarrëveshjeve
Shteti do të marrë përsipër zgjidhjen me ndërmjetësim të përplasjeve me bizeseve e qytetarëve në emër të mbrojtjes së të drejtave të konsumatorëve.
Një strukturë e posaçme pranë Ministrisë së Financave do të sigurojë zgjidhje alternative për mosmarrëveshjet mes tregtarëve e konsumatorëve. Është publikuar tashmë në Fletoren Zyrtare Vendimi i Qeverisë për ngritjen e Drejtorisë së Përgjithshme për Zgjidhjen Alternative të Mosmarrëveshjeve, E cila do të ketë mision të garantojë mbrojtjen e interesave të konsumatorit në treg përmes zgjidhjeve të mosmarrëveshjeve ndërmjet konsumatorit e tregtarit, që janë në fushën e saj të përgjegjësisë.
Detyrat e saj kryesore do të jenë shqyrtimi dhe zgjidhja e mosmarrëveshjeve ndërkohë që do ketë tagrin të vendosë, sipas rastit, dhe në përputhje me preferencat dhe vullnetin e shfaqur të konsumatorit, nëse do të propozojë apo detyrojë një zgjidhje, ose i takon palët me njëra-tjetrën, me qëllim që të mundësojë gjetjen e një zgjidhjeje, duke respektuar kërkesat e parashikuara në legjislacionin në fuqi për mbrojtjen e konsumatorit;
Nëse është rasti, Drejtoria organizon takimin e palëve me njëra-tjetrën, duke siguruar, përmes ndërmjetësimit, gjetjen e një zgjidhjeje, si dhe krijon mekanizmat e nevojshëm për të siguruar që konsumatori të paraqesë një ankesë on-line në faqen web, me postë apo, sipas rastit, në mënyrë të drejtpërdrejtë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.