Përplasjet për Komisionet “online”, tërhiqet PS – Balla: Do rishikojmë vendimin, vaksinohuni që mbledhjet të bëhen fizikisht në sallë

Presioni i fortë i deputeteve të Partisë Demokratike ka detyruar mazhorancën të bëjë një hap pas lidhur me debatin nëse Komisionet Parlamentare do të punojnë online, apo të pranishëm nëpër salla. Demokratët kanë insistuar edhe të mërkurën, duke u paraqitur fizikisht nëpër komisione duke akuzuar se qëllimi I vërtetë është shmangia e debatit parlamentar dhe nga akuzat për afera të opozitës. Debate pati në Komisionin e Ligjeve, në atë të Medias dhe të Veprimtarive Prodhuese, ku demokratët nuk u lejuan të merrnin fjalën në sallë, ndërkohë që Kreu I Komisionit të Ekonomisë e Financave Eduard Shalsi lejoi opozitarët në sallë duke u dhënë edhe fjalën.

Duket se kjo këmbëngulje ka dhënë rezultat pasi Kreu i Grupit Parlamentar të Partisë Socialiste, Taulant Balla tha për gazetarët se javën e ardhshme do të rishikohet vendimi i pjesëmarrjes në komisionet parlamentare, duke vënë kusht vaksinimin e deputetëve.

Debate për pjesëmarrjen fizike në punimet e Komisioneve nisi menjëherë pasi Konferenca e Kryetarëve vendosi që për shkak të Pandemisë Covid 19 mbledhjet të vijonin online, praktikë që vijon prej shfaqes së saj.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.