Përqendrimi nuk është pika juaj e fortë?! – Ja cilat profesione ju përshtaten më së miri

Përpos të gjitha avantazheve që ka sjellë epoka dixhitale, një pengesë e madhe e saj është dhe ekspozimi i tepërt ndaj çdo lloj informacioni, duke cënuar kështu ndjeshëm përqendrimin tonë. Një studim së fundmi, ka treguar se përdorimi i shtuar i rrjeteve sociale lidhet në mënyrë të pashmangshme me probleme të përqendrimit, empatinë, rritjen e narcizmit si dhe me pakënaqësinë e shtuar të jetës.  Padyshim, që ky lloj efekti mund të ketë pasoja të dëmshme intelektuale dhe kulturore për shoqërinë, dhe në kohët që jetojmë kjo situatë është më pak e pazakontë se dikur.

Një nga fushat që prek më shumë ky fenomen, është ajo e punës. Pra, jo të gjithë njerëzit janë të prirur që tu rezistojnë shpërqendrimeve, duke i shkaktuar jo pak herë probleme në vendin e punës për shkak të performancës së tyre të dobët. Por më poshtë, ju rendisim katër karriera të mundshme që mund t’u rezistojnë  edhe shpërqendrimit. Nëse e shihni veten të paaftë të përqendroheni në të njëjtën detyrë ose problem për periudha të zgjatura kohore, këtu janë disa opsione karriere që mund t’i përshtaten temperamentit dhe llojit tuaj.

1. Sipërmarrësi

Pak rrugë të karrierës do t’ju ofrojnë më shumë larmi sesa sipërmarrja, dhe kjo përfshin versionin e tij më të thjeshtë dhe më të vogël, përkatësisht të qenit i vetëpunësuar ose shefi juaj. Nga krijimi i një ideje, gjetja e burimeve për ta shndërruar atë ide në veprim, në bashkëveprimin me palët kryesore të interesit, deri tek shitja dhe zhvillimi i biznesit tuaj, nuk ka thjesht kohë për mërzitje apo rutinë kur e keni kthyer veten në një sipërmarrës. Studimet kanë treguar se sipërmarrësit kanë më pak të ngjarë të tolerojnë rutinën dhe parashikueshmërinë. Hulumtimi tregon gjithashtu se krahasuar me profesionistë të punësuar plotësisht, sipërmarrësit kanë tendencë të zhvillojnë një gamë më të gjerë të aftësive dhe ekspertizës.

PR / Marrëdhëniet me publikun 

Ky është një profesion për të gjithë ata që nuk qendrojnë dot larg mediave sociale apo informacionit. Praktikisht, duhet të jeni të përgatitur të reagoni ndaj çdo eventi lajmesh, ose të mësoni se si të komunikoni me audienca të ndryshme dhe në një gamë të gjerë të mediave. Profesionistët e PR duhet të jenë në gjendje të thithin dhe sintetizojnë sasi të madhe të informacionit, duke filtruar sa më pak të jetë e mundur, dhe duke i shmangur shpërqendrimet në lëndët e para të përmbajtjes dhe informacioneve që përçojnë.

3. Konsulent

Një tjetër alternativë e mirë në karrierë nëse doni të shmangni monotoninë dhe rutinën është këshillimi. Sigurisht, ka shumë lloje të ndryshme të karrierës së këshillimit, por gjithmonë jeni të vetëdijshëm se ajo që dini është më pak e rëndësishme sesa ajo që jeni të gatshëm të mësoni. Konsulentët janë gjithmonë më të suksesshëm kur janë gjeneralistë. Për më tepër, çdo detyrë është një mundësi unike për të mësuar diçka të re, për të kuptuar një klient të ri dhe për të zhvilluar ekspertizë të re.

4. Gazetari

Një opsion i fundit që mund të dëshironi të merrni në konsideratë nëse keni mendje hiperaktive është gazetaria. Në fakt, kjo karrierë shpesh kombinon elemente të tre karrierave të përshkruara më lart: Ju duhet të shisni veten si një sipërmarrës, të jeni gjithmonë të hapur dhe reagues ndaj lajmeve dhe ngjarjeve të botës reale, dhe ju duhet të jeni në gjendje të kaloni nga një temë në tjetrën, gjithnjë duke eksploruar pyetje të reja. Kjo nënkupton shndërrimin e shpërqendrimeve tuaja në përvojat aktuale të të mësuarit dhe të qenit shumë më pak sentimental për ato që dini dhe për ato që mund të mësoni.

Si përfundim, ajo që vërtet ka rëndësi për një performancë të mirë në punë, është padiskutim ndjekja e pasioneve si dhe të qëndroni besnik personalitetit tuaj.

Elefteria Zguri/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.