Personat e zhdukur gjatë komunizmit– Ministria e Brendshme nënshkruan marrëveshjen me ICMP për gjetjen e tyre
Është nënshkruar sot marrëveshja e bashkëpunimit ndërmjet qeverisë shqiptare dhe Komisionit Ndërkombëtar për Personat e Zhdukur (ICMP). Marrëveshja u firmos nga zv.ministrja Rovena Voda dhe drejtuesi i ICMP për Ballkanin Perëndimor, Matthew Holliday, ku morën pjesë edhe zyrtarë të lartë të qeverisë si dhe përfaqësues të ICMP-së.
Ajo synon intensifikimin e përpjekjeve për gjetjen e personave të zhdukur gjatë periudhës komuniste në Shqipëri, nga 29 nëntor 1944 deri në 2 korrik 1991. Në të përcaktohen rregullat e bashkëpunimit për identifikimin, gjetjen e personave të humbur, si dhe koordinimi i punës me organet përgjegjëse.
Duke e cilësuar këtë proces të gjatë dhe të ndërlikuar, Vodo tha se ai do të vendosë drejtësi për të gjithë familjarët e personave të zhdukur.
“Qeveria shqiptare do të bëjë çdo përpjekjeje që të përmbushë detyrimet e saj që burojnë nga kjo marrëveshje. Ne jemi të ndërgjegjshëm se ky është një proces i gjatë dhe i ndërlikuar, i cili kërkon shumë angazhim dhe punë, të palëve të përfshira në zgjidhjen e kësaj çështjeje, por shprehim përkushtimin tonë që të ndërmarrim të gjitha masat që ky proces të jetë sa më rezultativ”, u shpreh Vodo.
ICMP, organizata ndërkombëtare e ngarkuar për zbatimin e këtij procesi do të krijojë një Zyrë Shërbimi për gjetjen e personave të humbur.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.