Perspektiva e Moody’s për Rusinë – “Mund të përballojë sanksione të reja, pritet rritja e vlerësimit”
Ekonomia e Rusisë është fuqizuar mjaftueshëm për të përballuar sanksione të reja perëndimore dhe sipas agjencisë Moody’s, vlerësimi sovran i vendit mund të rritet deri në fund të këtij viti.
Ekonomia ruse, e shënjestruar nga sanksione ekonomike dhe financiare nga perëndimi që prej vitit 2014, ka nisur të rimëkëmbet vitin e kaluar, falë çmimeve më të larta të naftës dhe reformave strukturore të zbatuara nga Qeveria.
“Sipas analizës tonë, ekonomia dhe financat publike janë stabilizuar dhe mund të përballohen sanksione të reja”, deklaruan zyrtarët e Moody’s, përpara se Shtetet e Bashkuara përmendën biznesmenë të mëdhenj rusë në listën e oligarkëve që kanë lidhje me Kremlinin.
Javën e kaluar, Moody’s rriti perspektivën për vendin në “pozitive” nga të “qëndrueshme”, vetëm pak ditë përpara raportimeve të shumëpritura për sanksione të reja nga Shtetet e Bashkuara.
Departamenti i Thesarit në SHBA, publikoi më vonë listën e personave të pasur që kanë lidhje me Kremlinin, duke shtuar rrezikun e sanksioneve. Përmirësimi i perspektivës nga Moody’s vjen gjithashtu 2 muaj përpara zgjedhjeve presidenciale në Rusi, ku Vladimir Putin pritet gjerësisht të fitojë.
Këtë vit, Moody’s pret që ekonomia e Rusisë të rritet me 1.6%, inflacioni të arrijë objektivin e bankës qendrore prej 4% dhe rezervat ndërkombëtare të shtohen me 40 miliardë dollarë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.