“Perspektiva Ekonomike Botërore” – FMN ul projeksionet për këtë vit në 5.9%. Norma në 2022, e pandryshuar

Fondi Monetar Ndërkombëtar ka ulur projeksionet për ekonominë botërore këtë vit me 0.1% në 5.9% dhe ka mbajtur të pandryshuar normën për vitin 2022, në 4.9%, sipas raportit të fundit Perspektiva Ekonomike Botërore.   Fondi projektoi që rritja ekonomike kineze do arrijë 8% në vitin 2021, në rënie me 0.1% nga projeksioni i muajit Korrik. Rritja ekonomike e vendit pritet të qëndrojë në 5.6% më vitin 2022, që është gjithashtu 0.1% më poshtë se projeksionet e mëparshme.

Ndërprerjet e vazhdueshme të zinxhirit të ofertës dhe presionet në çmime po cënojnë rimëkëmbjen e ekonomive të zhvilluara në afat-shkurtër. FMN projekton që ekonomia e Shteteve të Bashkuara të rritet me 6% në vitin 2021 dhe me 5.2% në vitin 2022, në rënie me 0.1% dhe me 0.3% në mënyrë respektive nga raporti i muajit Korrik.

Zyrtarët e fondit mendojnë se ekonomia botërore po vazhdon rimëkëmbjen, por vrulli i rimëkëmbjes është dobësuar prej pandemisë së Covid-19, që është bërë pengesa më e madhe drejt rimëkëmbjes së plotë.   Paralelisht, përhapja e varianteve të koronavirusit ka prekur vende dhe rajone që janë pika lidhëse kryesore në zinxhirin botëror të ofertës, duke shkaktuar ndërprerje që po kanë zgjatur më shumë se sa pritej, cc’ka po nxit inflacion në shumë vende.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.