Perspektiva të ndryshme në Europë/ Gjermania do të heqë gradualisht karantinën. Britania dhe Franca do e zgjasin!
Gjermania ka prezantuar udhëzime për heqjen e kujdesshme të masave të karantinës, ndërsa qeveria britanike pritet të zgjasë izolimin e vendit. Gjermania lajmëroi se dyqanet e vogla, me një hapësirë poshtë 800 metra katrorë, do të lejohet të rihapen nga data 20 Prill, për sa kohë që aplikohen masat e higjenës dhe distancimit social. Përveç këtyre, dyqanet më të mëdha të makinave, dyqanet e bicikletave dhe libraritë, pritet të rihapen gjithashtu. Shkollat më vend pritet të hapen më 3 Maj, duke i dhënë prioritet studentëve që do ndërmarrin provime.
Megjithatë, mbledhjet në masë do të ndalohen deri më 31 Gusht. “Duhet të veprojmë me kujdes të madh”, tha kancelarja gjermane Angela Merkel, duke paralajmëruar se do të jetë diçka e rrezikshme. Gjermania është lavdëruar për trajtimin e krizës së koronavirusit, pasi ka mbi 134 mijë të infektuar dhe një numër të vdekjeve shumë më të ulët se vendet e tjera europiane, në 3,800. Ndërkohë që Gjermania po sheh një dritë në fund të tunelit, Mbretëria e Bashkuar duket se ndodhet në një gjendje shumë më të vështirë. Qeveria pritet të zgjasë karantinën në vend me 3 Javë, për shkak të paralajmërimeve se vendi mund të kthehet në më të goditurin në Europë.
Britania nuk është vendi i vetëm që po tregon kujdes, ndërkohë që Franca zgjati gjithashtu karantinën deri më 11 Maj. Por vendi ndodhet mbrapa homologëve europianë në lidhje me testimet. Për krahasim, ministri gjerman i Shëndetësisë, Jens Spahn, tha se vendi po zhvillon 100,000 teste në ditë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.