Pesha e turizmit në ekonominë shqiptare – Pandemia ndërpreu “hovin”. Përfaqëson 3.23% të PBB-së, me 54 mijë biznese

Turizmi si sektor i ekonomisë është padiskutim më i godituri nga pandemia. Varësia e ekonomisë shqiptare nga turizmi është pikërisht arsyeja pse goditja në ekonominë e përgjithshme ka qenë më e madhe në Shqipëri së në vendet e tjera të rajonit, gjë të cilën e kanë nënvizuar shumë institucione ndërkombëtare, që nga Banka Botërore, Banka Europiane për Rindërtim dhe Zhvillim (BERZH), FMN e deri te Standard and Poor`s së fundmi.

Por sa është ndikimi i kësaj industrie në ekonominë shqiptare? Drejtpërdrejtë, sipas të dhënave të sapo publikuara nga Instat, turizmi si industri përfaqëson 3.23% të Prodhimit të Brendshëm Bruto. Indirekt kjo shifër rritet me disa-fish, ndërkohë që shumë vlerësime flasin për një normë mbi 20%. Sektori punëson rreth 64 mijë individë, të cilët janë edhe ndër shtresat më të goditura nga kriza që ka shkaktuar pandemia.

Sa i përket numrit të bizneseve që operojnë në këtë industri, në total janë rreth 54 mijë, sipas të dhënave të vitit 2019, në rritje të ndjeshme krahasuar me vitin paraardhës, me më shumë se 8 mijë njësi biznesi. Edhe vlera e shtuar e industrisë në ekonominë shqiptare është rritur me 18.3% gjatë vitit 2019, krahasuar me vitin 2018. Të gjitha këto të dhëna jo vetëm që konfirmojnë dëmin e madh që ka pësuar ky sektor dhe ekonomia shqiptare në tërësi si pasojë e pandemisë, por edhe ndërprerjen e hovit të sektorit, në momentin e tij më të mirë.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.