Pesha jonë ekonomike – Eurostat: PBB e Shqipërisë në 13.6 miliard euro në 2019-ën
Eurostat e vlerëson Prodhimin e Brendshëm Bruto të Shqipërisë në 13.6 miliardë euro për vitin 2019. Krahasuar me Europën, vetëm Malta rezulton të ketë një prodhim ekonomik më të ulët se Shqipëria për vitin 2019, prej vetëm 13.2 miliardë euro. Për vendet e rajonit ndërkohë mungon një vlerësim për vitin 2019, me përjashtim të Serbisë, ku ekonomia vlerësohet për vitin e kaluar në masën e 46 miliardë eurove.
Por, duke e krahasuar Shqipërinë me vendet e tjera të rajonit sipas të dhënave të vitit 2018, rezulton se Mali i Zi, Kosova dhe Maqedonia e Veriut kanë një ekonomi ndjeshëm më të vogël se e jona, në terma të prodhimit ekonomik, paçka se janë vende me popullsi më të vogël. Bosnje Hercegovina ndërkohë ka një ekonomi në mbi 16 mld euro në vit dhe duket se për shumë kohë do të jetë konkurrenti ynë numër një në rajon.
Sa i përket Europës në tërësi, vendet e para nuk kanë ndryshuar, me Gjermaninë të parën, duke zënë thuajse ¼ e PBB së Bashkimit Europian, e ndjekur nga Franca e më pas Italia, Spanja e Holanda. Mesatarja e bashkimit europian flet për një PBB në 13.9 trilionë euro.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.