Peticioni i ish-ushtarakëve: Përmirësim pensionit të parakohshëm, rritje përfitimi suplementar për pensionet e ‘92-‘98
Rishikim të skemës së pensionit të parakohshëm dhe rritje të pensionit suplementar për kategorinë e ish-ushtarakëve që iu është llogaritur përfitimi në periudhën ‘92-‘98. Janë dy kërkesat e parashtruara nga Shoqata Kombëtare e Ushtarakëve. Pak ditë para zgjedhjeve kjo shoqatë ka dalë me një qendrim duke u bërë të qartë subjekteve politike shqetësimet më prezente që prekin këtë shtresë.
“Duhet përmirësuar formula e pensionit të parakoshhëm për vjetërsi shërbimi. Konkretisht ajo mund të mbetet 1.5 % për çdo vit shërbimi por për pagën bruto të vitit të fundit ose le të mbetet përcaktimi për pagën neto të të gjitha vitet e punës por të bëhet 2 % për çdo vit pune” propozohet nga shoqata, raporton “Panorama”.
Një tjetër kërkesë parashtruar qeverisë është edhe ajo për rritjen e pensionit suplementar për pensionet e lidhura në periudhën 1992-1998. Sipas Hekuran Bajramit, Kryetar i Këshillit Drejtues të Tiranës ky shqetësim është ngritur edhe më herët por nuk ka asgjë konkrete. “Ka një kategori ushtarakësh që kanë dalë në pension pleqërie në periudhën 1992-98 dhe marrin pension suplementar të vogël sepse nuk u është rritur vit pas viti siç u rrit pensioni i pleqërisë por vetëm u indeksua. Është pranuar ky shqetësim nga ministria e Mirëqënies Sociale dhe nga Instituti i Sigurimeve Shoqërore është hartuar edhe një projektvendim por nuk po realizohet” shprehet ai.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.