Pezullimi i llogarisë së projektit “Vicinity” në Twitter/ Reagon kryeredaktorja: Në vendet e rajonit, po mbyten tonet kritike

Fondi Europian për Ballkanin dhe Lëvizjes Europiane në Serbi  informon se llogaria në Twitter e portalit Vicinity (www.okruzenje.net) është pezulluar më 18 maj të këtij viti.  Edhe pse janë përdorur të gjtihë mënyrat e ankimimit, llogaria vijon të mbetet e pezulluar.

“Në vendet e rajonit, po mbyten tonet kritike, hapësira mediatike është ngushtuar dhe është e vështirë të stabilizohet.  Heqja e së drejtës së kësaj hapësire, që është e arritshme për të gjithë, është një veprim shkatërrues, por nuk do të na dekurajojë” shprehet Zvezdana Kovač, Kryeredaktore e projektit ‘Vicinity’.

Në këto kushte, ajo informon se pas dy muajve mungesë në Twitter, projekti vjen me një  llogari të re, me emrin Vicinities / Okruzenje (@Okruzenje_WB).

Reagimi i plotë në emër të Fondit Europian për Ballkanin dhe Lëvizjes Europiane në Serbi i Zvezdana Kovač, Kryeredaktore e projektit ‘Vicinity’:

Dëshirojmë t’ju informojmë se llogaria në Twitter e portalit Vicinity (www.okruzenje.net) është pezulluar më 18 maj të këtij viti. Ne i kemi përdorur të gjitha mënyrat e mundshme të ankimimit, por fatkeqësisht, deri më sot llogaria është e pezulluar. 

Pa dashur të ndërhyjmë në politikën e biznesit të Twitter-it dhe të analizojmë kriteret që përdor për të pezulluar një llogari, jemi të befasuar që një projekt si “Vicinity” ishte mes të padëshiruarve, pasi, së pari, nëpërmjet gjashtë sezoneve të serive të tij televizive (transmetuar në 13 kanale në ish Jugosllavi dhe në Shqipëri) dhe më pas për dhjetë muaj në portalin në rrjet, ekipi i projektit “Vicinity” ka punuar dhe ka bërë gjithçka për të bashkuar qytetarët e rajonit rreth idesë të pajtimit, duke nxitur parimet demokratike dhe të gjitha vlerat themelore njerëzore europiane – universale. 

Projekti i Fondit Europian për Ballkanin dhe Lëvizjes Europiane në Serbi ka qenë një hapësirë e gjerë për reflektim kritik, shkëmbim argumentesh dhe idesh, duke ushqyer një kulturë dialogu në promovimin e ideve të pajtimit dhe bashkëpunimit në Ballkanin Perëndimor.  Për këtë, në vitin 2016, projekti u vlerësua me çmimin Iniciativa Mediatike e Vitit nga “European Citizenship Award”.

Llogaria e projektit Vicinity u pezullua ditën e botimit të temës ‘Nacionalizmi dhe ndikimi i tij shkatërrues në procesin e pajtimit’.  Ne besojmë se Twitter-i, me dëshirën e mirë për të identifikuar dhe ndaluar përhapjen e ideve që janë krejtësisht tjetër nga ajo çfarë ne promovojmë, ka bërë një gabim.

Fondi Europian për Ballkanin dhe Lëvizja Europiane në Serbi mbështesin dhe inkurajojnë përpjekjet për të rregulluar hapësirën e gjerë mediatike në rrjetet sociale dhe bëjnë thirrje për gjetjen e mekanizmave në mënyrë që ata që e drejtojnë angazhimin e tyre profesional drejt këtij qëllimi, të mos pengohen në këto përpjekje. 

Është e qartë që përveç sulmit të fundit të hacker-ave në faqen tonë të internetit, llogaria në Twitter u pezullua në momentin kur ne ia kushtuam këtë temë historisë së të keqes që lloje të ndryshme nacionalizmi u kanë shkaktuar qytetarëve të rajonit.

Në vendet e rajonit, po mbyten tonet kritike, hapësira mediatike është ngushtuar dhe është e vështirë të stabilizohet.  Heqja e së drejtës së kësaj hapësire, që është e arritshme për të gjithë, është një veprim shkatërrues, por nuk do të na dekurajojë.  

Ne do të vazhdojmë të flasim pa hezitim për gjithçka që rrezikon dinjitetin dhe të drejtën e një jete normale për të gjithë qytetarët e rajonit.  

Numri i ndjekësve të Vicinity, që po rritet dita ditës (siç dëshmohet nga statistikat e portalit tonë në internet dhe numrit të njerëzve që na ndjekin në rrjetet sociale), na detyron ta bëjmë këtë.   

Ne nuk kemi qenë Twitter për dy muaj, por të gjithë ata që na kanë ndjekur më parë dhe gjithë të tjerët, mund të na gjejnë përsëri aty me emrin Vicinities / Okruzenje (@Okruzenje_WB).

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.