Pfizer do të vazhdojë të furnizojë Italinë me vaksina edhe nëse Roma vijon me padinë kundër kompanisë
Pfizer do të vazhdojë të furnizojë Italinë me vaksinën e saj COVID-19, duke respektuar marrëveshjen e saj me Komisionin Europian, edhe nëse Roma padit kompaninë, tha të enjten shefi ekzekutiv i njësisë italiane të grupit.
“Ne nuk kemi ndërmend të spekulojmë për këtë, por ne do të vazhdojmë të furnizojmë vaksinën siç parashikohet nga marrëveshjet me Komisionin Europian,” tha CEO i Pfizer në Itali, Paivi Kerkola, në një intervistë me të përditshmen la Repubblica.
Kerkola tha se furnizimi i vaksinave të grupit në Itali do të kthehej në statusin në “rregull” këtë javë.
Të martën, Italia i kërkoi Komisionit Europian të ndërmarrë veprime kundër Pfizer rreth shkurtimeve të dërgesave të vaksinave COVID-19, një ditë pasi Roma i kishte dërguar një letër zyrtare paralajmëruese kompanisë amerikane të ilaçeve duke e thirrur atë për të respektuar angazhimet e saj kontraktuale pas vonesave me dërgesat.
Javën e kaluar Pfizer tha se po ngadalësonte përkohësisht furnizimet në Europë për të bërë ndryshime në prodhim që do të rrisnin prodhimin si rrjedhojë.
Kerkola tha se ajo besonte se grupi do të ishte në gjendje të furnizonte rreth 2 miliardë doza vaksine deri në fund të vitit dhe që rritjet në vëllimin e prodhimit do të shiheshin nga mesi i shkurtit.
I pyetur në lidhje me ndryshimin në çmimet e vaksinave që Pfizer aplikoi në vende të ndryshme, ekzekutivi tha se çmimet mbetën konfidenciale por kompania përdori një parim të “aksesit të drejtë”, me vendet me të ardhura më të larta duke shpenzuar më shumë dhe vendet me të ardhura më të ulëta më pak. (Reuters)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.