Pikëpyetjet e 14 shtatorit! 1 në 7 shqiptarë është nxënës, jemi ndër sistemet arsimore më të mbigarkuara në Europë
Ministria e arsimit ka njoftuar nisjen e vitit të ri shkollor ende pa një protokoll të detajuar për të parandaluar sadopak përhapjen e covid-19 në popullsi.
Vonesa në detajimin e protokollit vjen pavarësisht faktit se kanë kaluar mbi 5 muaj që nga mbyllja e institucioneve arsiomore në vendin tonë në kuadër të strategjisë për të parandaluar përhapjen e virusit.
Me një prezencë të lartë të nxënësve në popullsi dhe me një mbingarkesë të shkollave dhe klasave, sidomos në kryeqytetet, rihapja e shkollave pa një plan të detajuar dhe pa rotacion ose ndërthurje me mësimin online, rrezikon të kthehet në brumin kryesor të përhapjes së virusit në vendin tonë, sidomos me ardhjen e stinës së vjeshtës dhe dimrit. Sipas Institutit të statistikave, Shqipëria numëron 148 nxënës për 1 mijë banorë.
Pra, thuajse 1 në 7 banorë të republikës, prej datës 14 shtator do të frekuentojë një institucion arsimor, në të cilin do të jetë shumë e vështirë të respekltohen protokollet e sigurisë shëndetësore, me distancimin fizik që është kryefjala. Shqipëria numëroin rreth 423 mijë nxënës, për rreth 2 mijë institucione arsimore 9 vjeçare dhe të arsimit të mesëm. Mesatarisht, një shkollë në vend mban rreth 200 nxënës.
Por, hendeku i kryeqytetit me rrethet sa i përket mbingarkesës duket mjaft i madh. Jashtë Tiranës, numërohen mesatarisht, rreth 187 nxënës për një shkollë. Në 11 njësitë administrative të kryeqytetit ndërkohë, numërohen mesatarisht 308 nxënës për një shkollë. Por edhe mes vetë këtyre njësive administrative, diferencat janë të ndjeshme. Një tjetër tregues i mbingarkesës së shkollave dhe klasave është edhe ai i raportit të mësuesve për nxënës.
Në arsimin fillor në vendin tonë, për shkollat publike, kjo normë fiksohet në 17.4 nxënës për mësues. Mesatarja europiane flet për një normë në 14.7. Kjo normë e vendos Shqipërinë ndër vendet e para në Europë sa i përket mbingarkesës më të lartë, më mirë vetëm se Franca, Rumania dhe Çekia.
Duke i shtuar të gjithë kësaj situate një strategjie të autoriteteve shumë pak efikase dhe sidomos kapacitete të cunguara në identifikimin dhe gjrumimin e rasteve të infeksioneve me covid-19, rihapja e shkollave është një rrezik parësor, pa një protokoll që të garantojë shëndetin jo vetëm të nxënësve, mësuesve dhe prindërve, por shëndetin publik.
Një protokoll i tillë ka një emërues të përbashkët; distancimin fizik, që mund të arrihet përvec maskave dhe higjienës, edhe me rotacionin e nxënësve, dhe sidomos me mësimin online, një metodë e testuar, që funksionon.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.