Pikëpyetjet e Ballkanit Perëndimor në “Argument”: Mesazhet që jep nisma për ‘mini-shengenin’ dhe mungesa e Kosovës

Zëvëndësministri i Mbrojtjes Petro Koçi e sheh nismën për krijimin e mini-shengenit ballkanik si një hap përpara në marrëdhëniet rajonale për krijimin e një tregu të përbashkët ku lëvizin mallrat, njerëzit dhe kapitalet.

Duke folur në emisionin “Argument” të gazetarit Enio Civici, Koçi tha se ky bashkëpunim është një një mesazh politik që i jepet Europës se ne si rajon jemi të gatshëm për të adoptuar parime europiane.

“Dhe nga ana tjetër është edhe një mesazh ekonomik se krijon premisat që në rajon të vijnë më shumë investitorë strategjikë. Një treg më i bashkuar sjell interes për investutorë më të fuqishëm që të jenë në të ardhmen” tha Koçi.

Por kjo, sipas tij, nuk e pengon asnjë nga vendet që të ketë marrëdhënie preferenciale në planin bilateral siç është rasti i marrëdhënies së Shqipërisë me Kosovën.

Por a mund të quhet i zbatueshëm dhe i kompletuar projekti për mini-shengenin ballkanit kur mungon Kosova?

Sipas ish ambasadorit shqiptar në Maqedoni, Arben Çejku nismat rajonale nuk duhen refuzuar apriori dhe  mund të konsiderohen të mirëseardhura. Megjithatë, ai evidenton se kjo nismë është e paplotë në kushtet kur mungon Kosova dhe Bosnja.

“Parimisht të gjitha këto iniciativa dhe nisma rajonale në këndvështrimin e marrëdhënieve ndërkombëtare janë të mirëseeradhura e nuk duhen refuzuar apriopri. Duhet të ndajmë këndvështrimin diplomatik të kësaj nisme me atë çfarë presupozon të realizojë dhe cilët do të jenë pjesëmarrësit dhe produkti.

Për fat të keq gravitetin e debatit e ka tërhequr marrëdhënia e Kosovës dhe Bosnjës e Malit të Zi në këtë iniciativë. Pra ishin gati tre takime pothuajse të dështuara sepse mungesa e pjesëmarrjes së plotë të rajonit nuk e bën dot nismë rajonale” tha Çejku.

Emisioni i plotë:  

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.