Piramida e pasurisë globale – 1%-shi kalon gjysmën, “të rinjtë” kanë më vështirësi se prindërit e tyre
Sipas analistëve të Credit Suisse, 1% më të pasurit zotërojnë tashmë më shumë se gjysmën e pasurisë së ekonomive familjare në të gjithë botën dhe pabarazia po vjen e po thellohet, me gjeneratën e re që do të përballet me vështirësi.
Banka zvicerane publikoi raportin e fundit mbi Pasurinë Globale, së bashku me një deklaratë ku thuhej se “Perspektiva për segmentin e milionerëve është më optimiste se për pjesën e fundme të piramidës së pasurisë”. Sipas hulumtimit, numri i milionerëve në dollarë është rritur dhe Credit Suisse pret që rritja e tyre të kalojë 22% në një total prej 44 milionë deri në vitin 2022. Nga ana tjetër, numri i të rriturve që kanë më pak se 10 mijë dollarë pritet të tkurret me vetëm 4%.
Kërkuesit e bankës e lidhin pabarazinë në pasuri kryesisht me krizën financiare, duke qenë se është thelluar në të gjithë botën nga 2007 në 2016, për shkak se aktivet financiare janë rritur më shpejtë se aktivet jo-financiare. 1%-shi më i pasur e nisi mijëvjeçarin me 45.5% të të gjithë pasurisë dhe tashmë kanë 50.1%. Që prej mesit të 2016-ës, perspektiva ka qenë mikse sipas Credit Suisse, ndërkohë që pasuria jo-financiare është rritur ndjeshëm por pabarazia ka treguar gjithashtu rritje.
“Duke parë fundin e shpërndarjes së pasurisë, 3.5 miliardë njerëz, që përbëjnë 70% të të gjithë të rriturve në botë, zotërojnë më pak se 10 mijë dollarë. Për rrjedhojë, gjenerata e re që ka pak shanse të akumulojë asete, përballet me sfida më të mëdha se gjeneratat e tjera”, nënvizon raporti.
Sipas Credi Suisse, gjenerata e re ka më shumë gjasa të jetë e papunë apo me të ardhura të ulëta dhe në pamundësi për të përballuar tregun e shtëpive. Për rrjedhojë, ata kanë më shumë vështirësi se prindërit e tyre në të njëjtën moshë.
Ky brez mund të ketë edukim më të mirë se gjeneratat e mëparshme, megjithatë analistët e Credit Suisse thonë se vetëm një pjesë e vogël do të ketë arritje dhe se vetëm ata në sektorë me kërkesë të lartë si teknologjia apo financa, pritet të tejkalojnë disavantazhin e mijëvjeçarit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.