Plakja e popullsisë – Kina nxit çiftet të bëjnë dy fëmijë

Kina po mendon të vendosë një shpërblim për çiftet të cilat lindin një fëmijë të dytë, për të nxitur lindshmërinë. Në vitin 2015 qeveria vendosi të hiqte politikën që lejonte vetëm një fëmijë.

“Qeveria po mendon të vendosë shpërblime dhe ndihmë ekonomike, për të inkurajuar njerëzit të bëjnë një fëmijë të dytë”, tha Wang Peian, deputet në komisionin e Shëndetit dhe planifikimit familjar.

Nëse miratohen, këto subvencione do të përfaqësojnë një ndryshim themelor në politikën e partisë në planifikimin familjar, nga kufizimi drejt nxitjes së të bërit fëmijë.

Kufizimi i vënë në zbatim në fund të viteve ’70, tashmë po jep një efekt negativ në ekonominë e vendit, me mungesa në krahun e punës, si pasojë e plakjes së popullsisë.

Lejimi i çifteve për të bërë dy fëmijë ende nuk ka dhënë rezultatet e pritura, si pasojë e kostove për rritjen e një fëmije, të cilat janë bërë kufizuese për familjet kineze.

Kjo politikë që pritet të zbatohet është në një linjë me propozimet e demografëve më të mirë në vend. Tashmë autoritetet kineze duhet të shfrytëzojnë shërbimet publike si kopshtet dhe shkollat për të ulur kostot e rritjes dhe për të inkurajuar prindërit të bëjnë më tepër fëmijë.

Lindjet në Kinë arritën në 17,86 milionë vitin e kaluar, një rritje prej 1,3 milionë krahasuar me 2015-ën. Zbatimi i politikës së inkurajimit do të rriste me 17 milionë numrin e lindjeve në vit, çka nënkupton 30 milionë punëtorë të rinj të gatshëm për t’u futur në tregun e punës në vitin 2050.

Sipas komisionit të planifikimit familjar, rritja në krahun e punës do të sillte një rritje ekonomike shtesë prej 0.5 për qind.

Në vitin 2050, pritet që një në tre kinezë të jenë mbi moshën 60-vjeçare, duke krijuar sfida të mëdha për sistemin e mirëqenies sociale. Raporti i tanishëm është një me shtatë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.