Plan i ri veprimi nga qeveria për të luftuar korrupsionin. Krijohet Komiteti Koordinator dhe Task-forca Antikorrupsion
Qeveria ka ndryshuar vendimin e saj që daton në vitin 2015, ku përshkruhej strategjia ndërsektoriale që do ndiqej kundër korrupsionit në administratën publike deri në vitin 2020, për ta zëvendësuar me një plan të ri veprimi që zgjatet deri në vitin 2023.
Në këtë plan të ri ndërsektorial, ndryshimi kryesor është krijimi i Komitetit Koordinator, një organ që do të drejtohet nga ministri i Drejtësisë dhe që përbëhet nga 10 zv.ministra të tjerë.
Më tej, në vendim shkruhet se Komiteti mblidhet jo më pak se një herë në tre muaj dhe sa herë është e nevojshme, me kërkesë të ministrit të Drejtësisë. Në mbledhjet e komitetit mund të ftohen të marrin pjesë edhe përfaqësues të organeve të qeverisjes qendrore e vendore apo të institucioneve të tjera.
Gjithashtu pjesë e Komitetit Koordinator do të jetë edhe një organ i ri i quajtur Task-Forca Ndërinstitucionale Antikorrupsion, përgjegjëse për inspektimet ndërinstitucionale dhe që përbëhett nga këta anëtarë:
- Përfaqësues të kabinetit të Kryeministrit (koordinatori i ZOS-it);
⦁ Drejtorin e Përgjithshëm të Agjencisë së Prokurimit Publik;
⦁ Inspektorin e Përgjithshëm të Inspektoratit Qendror;
⦁ Përfaqësuesin e Departamentit të Administrimit, Transparencës dhe Antikorrupsionit, në Kryeministri.
Këto struktura të reja, pjesë e Planit të Veprimit kundër Korrupsionit, pritet të bashkërendojnë punën e të gjitha institucioneve për të kontrolluar cilësinë dhe zbatueshmërinë e ligjit, sipas vlerësimit të riskut që këto institucione paraqesin nga pikëpamja e abuzimeve dhe praktikave korruptive dhe duke raportuar periodikisht për zbulimet e tyre pranë titullarëve të institucioneve përkatëse për marrjen e masave të duhura.
G.K / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.