Planet për rritjen e çmimit të energjisë – Projektbuxheti 2022/Qeveria do të rishikojë skemën e mbështetjes sociale për rimbursimin

Pavarësisht se është Enti Rregullator i Energjisë që do të vendosë nëse do të ketë një rritje të çmimit të energjisë elektrike, qeveria do të rishikojë skemën e mbështetjes sociale për rimbursimin e energjisë. Sipas relacionit që shoqëron projektbuxhetin për vitin 2022, Ministria e Financave dhe Ekonomisë ka dhënë miratimin paraprak për këtë çështje, dhe asistenca teknike për vlerësimin e skemës aktuale ka filluar punën.

Paralelisht, janë bërë edhe parashikimet buxhetore për Institutin e Sigurimeve Shoqërore, që është institucioni që menaxhon kompensimet për rritjen e çmimit të energjisë, ku përcaktohet se për këtë zë do të shpenzohen  5 048.000 000 lekë, nga 4 621 000 000 lekë që u pagua përgjatë vitit 2021. Ndërkohë që, për herë të parë është shtuar edhe një zë i ri që quhet “politika të reja pensionesh”, me një total prej 5,074 000 000 lekësh.

Në relacion përshkruhet situata e vështirë financiare e Operatorit të Shpërndarjes së Energjisë Elektrike, duke specifikuar se në këto kushte, OSHEE është duke programuar masa të shpejta lidhur me daljen në Treg të Lirë të konsumatorëve, duke propozuar rritjen e tarifave të shpërndarjes si edhe rishikuar çmimin final të konsumatorëve.

Propozimi për rritjen e tarifës së shpërndarjes ka mbërritur edhe pranë Entit Rregullator të Energjisë  që fillimisht do të duhet të vendosë nëse do të fillojë shqyrtimin e aplikimet. Ndërkohë që, në rast të shqyrtimit është pikërisht ky dikaster që vendos mbi nivelin e tarifave përfundimtare që do të aplikohen gjatë vitit 2022. Paralelisht, në pritje është edhe aplikimi që do të kryhet nga Furnizuesi i Shërbimit Universal, për çmimin e shitjes me pakicë të energjisë e nëse kjo kompani do të zgjedhë të përballojë me të ardhurat e veta rritjen e mundshme të tarifave të transmetimit dhe shpërndarjes apo të shkarkojë këtë rritje tek abonentët e saj familjarë e biznese.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.