Plani “anti-euro” – Memorandum për të rritur përdorimin e lekut
Banka e Shqipërisë, Ministria e Financave dhe Autoriteti i Mbikëqyrjes Financiare nënshkruan të martën memorandumin e bashkëpunimit për zgjerimin e përdorimit të lekut në ekonomi dhe në sistemin financiar.
Nënshkrimi i këtij dokumenti ishte paralajmëruar, në funksion të uljes së rreziqeve për stabilitetin financiar dhe në rritjen e efikasitetit të politikës monetare.
Përmes memorandumit, Ministria e Financave merr përsipër të rrisë preferencën e agjentëve ekonomikë për përdorimin e lekut në transaksionet financiare dhe ato të kursimit, si edhe të ndërmarrë ose të mbështesë çdo veprim tjetër ligjor ose operacional, që mbështet zgjerimin e shkallës së përdorimit të lekut në shlyerjen e detyrimeve financiare.
Gjithashtu, Ministria e Financave angazhohet të rrisë preferencën për huamarrje në monedhën kombëtare nga institucionet publike, si edhe të ofrojë ekspertizën dhe bashkëpunimin, për të zhvilluar më tej tregun primar dhe sekondar të titujve të borxhit në lek. Banka e Shqipërisë angazhohet të ruajë kuadrin aktual të politikës monetare mbështetur mbi shënjestrimin e inflacionit dhe kursin e lirë të këmbimit, si kusht për ruajtjen e besueshmërisë së publikut të tregjeve tek monedha kombëtare.
Gjithashtu, Banka Qendrore do të përmirësojë kuadrin rregullativ, operacional dhe mbikëqyrës, me qëllim që të pakësojë ekspozimin në valutë të sektorit bankar.
Kërkesat rregullative të transparencës në produktet dhe shërbimet financiare do të forcohen, në mënyrë që rreziqet e ekspozimin ndaj valutave të huaja të jenë më të qarta për agjentët ekonomikë.
Banka e Shqipërisë do të kontribuojë gjithashtu në zhvillimin e produkteve dhe të instrumenteve financiare, që mbështesin përdorimin e lekut nga bankat dhe nga klientët e tyre.
Angazhime të ngjashme ka marrë edhe Autoriteti i Mbikëqyrjes Financiare, për tregjet e rregulluara dhe të mbikëqyrura prej tij.
Rreth 60% e kredisë dhe 53% e depozitave të sistemit financiar shqiptar janë në valutë të huaj, ndërsa euro përdoret gjerësisht për transaksionet e brendshme, sidomos në tregtimin e pasurive të paluajtshme dhe të mallrave të qëndrueshëm.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.