Plani i Francës për taksimin e firmave – SHBA mbështet thirrjen për një taksë të gjigantëve dixhitalë
Sekretari i Thesarit Steven Mnuchin, tha se SHBA mbështet thirrjen e Francës në grupin e 7 ekonomive më të mëdha, për një nivel dysheme për taksimin e korporatave. Franca ka deklaruar se do të përdorë presidencën në G7 këtë vit për të arritur një marrëveshje për një nivel dysheme për taksimin e korporatave. Franca ka nisur gjithashtu një nismë në nivel të BE, për taksimin e gjigantëve dixhital si Amazon dhe Facebook.
Këto të fundit, Parisi dhe shumë vende të tjera europiane i shohin si firma përfituese, pasi reduktojnë në mënyrë të padrejtë faturën tatimore duke regjistruar fitimet në vende të tjera me taksa të ulëta. Ndërkohë që BE nuk ka gjasa të arrijë një marrëveshje përballë kundërshtisë së vendeve si Irlanda, Franca dhe disa vende të tjera të BE po përpiqen të prezantojnë taksën e tyre dixhitale në nivel kombëtar. Mnuchin tha se e përkrah këtë çështje, por shtoi se ky është një problem më i gjerë dhe jo i fokusuar vetëm te kompanitë dixhitale.
Mnuchin ndodhet në një vizitë në Paris, ndërkohë që Uashingtoni po përpiqet të fitojë mbështetje europiane për kandidatët që do të drejtojnë Bankën Botërore. Ministri francez i Financave, Bruno le Maire, tha se David Malpass përbën një kandidat të mirë për të drejtuar Organizatën. Ai tha se është e rëndësishme që Banka Botërore të vazhdojë të ndihmojë vendet më të varfëra dhe mbështesë luftën kundër ndryshimit klimatik.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.