“Planifikoni tenderët për vitin 2021” – APP, institucioneve: Nuk ka prokurime pa i regjistruar në sistemin elektronik
Agjencia e Prokurimit Publik iu kërkon institucioneve të fillojnë planifikimin e procedurave tenderuese për vitin 2021, përsa kohë fondet i kanë të parashikuara në palnet buxhetore afatmesme. Për këtë qëllim, autoritetet kontraktore duhet të vijojnë menjëherë punën për krijimin në Sistemin e Prokurimit Elektronik të elementit përkatës të regjistrit të parashikimeve të prcedurës së prokurimit që do të zhvillojnë, për mbulimin e nevojave për mallra, punë e shërbime në vitin që vjen. Gjithashtu, APP iu kujton institucioneve se kanë të drejtë të zhvillojnë procedurat dhe të shpallnin kompanitë fituese, ndërkohë që lidhja e kontratës do të bëhet pasi fondi limit të jetë në dispozicion.
Ndërkaq, në kuadër të detyrimeve për disiplinimin e angazhimeve buxhetore, autoritetet nuk do të lejohen të zhvillojnë tenderë mbi kufirin e prokurimit me vlerë të vogël të parashikuara për t’u zhvilluara brenda këtij viti, të cilat nuk janë pasqyruar në regjistrimin e parashikimeve deri në datën 15 tetor 2020. Këto rekomandime vijnë pak ditë pasi në Kuvend është depozituar ligji i ri “Për prokurimin publik”, i cili parashikon një sërë ndryshimesh në drejtim të procedurave tenderuese. Ndër të tjera, drafti i propozuar shton disa lloje të reja të procedurave të prokurimit, ku 2 prej tyre janë procedura konkurruese me negocim dhe dialogu konkurruese.
Një tjetër risi e draftligjit janë edhe kontratat e rezervuara, ku entet kontraktore mund t’u rezervojnë të drejtën e pjesëmarrjes në tenderë për operatorë të caktuar ekonomikë, me kusht që të paktën 30 % e punonjësve të tyre janë punëtorë me aftësi të kufizuara ose punonjës në nevojë. Ndërkaq, ligji i ri do të lejojë modifike të kontratave gjatë afatit të tyre, me një kufi të lejuar të modifikimit deri në 20% të vlerës së kontratës fillestare. Ndërkaq, paralelisht me ligjin e ri, prezenca e OSBE-së në Shqipëri ka nisur punë kërkimore për të evidentuar rreziqet dhe për të parandaluar korrupsionin në fushën e prokurimeve publike. Me anë të këtij projekti synohet forcimi i kapaciteteve dhe rritja e transparencës dhe të llogaridhënies të sistemit të prokurimit publik në Shqipëri. Ndërkohë që, do të ofrohen rekomandime për përmirësimin e kuadrit të politikave dhe për zhvillimin e kapaciteteve.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.