Plazhet e Greqisë/ A mund t’i shpëtojnë zhdukjes nga ‘dallgët’ e ndryshimeve klimatike?!

Dielli flakërues, plazhet spektakolare, stili i jetesës mesdhetare dhe ushqimi i mrekullueshëm janë pikërisht arsyet kryesore që miliona njerëz udhëtojnë në Greqi çdo vit. Vendi ka qenë një nga destinacionet verore më të njohura të Europës që nga vitet 1950, në të njëjtën dekadë kur udhëtimi në ishull u bë një përvojë e domosdoshme për turistët.

Me gati 15,000 kilometra vijë bregdetare, Greqia ka opsione për çdo shije dhe çdo buxhet, pavarësisht nëse ju pëlqen një plazh më i rezervuar, i egër ose jeni duke kërkuar për një vend të zënë dhe në modë për të kërcyer gjatë natës.

E megjithatë, kjo parajsë mesdhetare mund të mos jetë atje për shumë më gjatë. Gati një e treta e vijës bregdetare të Greqisë po gërryhet. Dhe ndërsa erozioni i bregdetit është një fenomen natyror, ndryshimet klimatike po e përshpejtojnë atë me një ritëm të paqëndrueshëm.

Shkencëtarët vlerësojnë se ngrohja globale do të shkaktojë erozionin e 36,097 kilometrave të zonave ranore në mbarë botën në 30 vjet, nëse temperaturat vazhdojnë të rriten me këtë ritëm. Vija bregdetare globale e kombinuar arrin në 356,000 kilometra, sipas vlerësimeve – kështu që do të ishte një humbje prej 10 %.

Në vitin 2021, Agjencia Europiane e Hapësirës krahasoi imazhet satelitore të vijës bregdetare greke nga viti 1995 deri në vitin 2020, duke zbuluar se pothuajse 10 % e 900 kilometrave të tokës së studiuar ishin tërhequr me më shumë se tre metra çdo vit. Ekspertët kanë frikë se pothuajse gjysma e të gjitha plazheve të tilla mund të jenë afër zhdukjes deri në fund të shekullit, siç përmendet në një studim nga Qendra e Përbashkët Kërkimore e Komisionit Europian.

Greqia është jashtëzakonisht e ekspozuar ndaj erozionit bregdetar, i cili pritet të ndryshojë thellësisht vijën bregdetare të vendit në 80 vitet e ardhshme. Në fakt, disa nga pikat e preferuara të pushimeve në botë, nga Santorini në Mykonos, mund të mos jenë të njëjta deri në vitin 2100, zbuloi një hulumtim nga kompania e udhëtimeve luksoze Unforgettable Greece.

Kompania ka përdorur Photoshop për të krijuar foto të pabesueshme para dhe pas që tregojnë erozionin bregdetar. Vija bregdetare pritet të tërhiqet në mënyrë të rrezikshme pranë ndërtesave ikonike të zbardhura të Santorinit, pasi 150 metra bregdet rreth Firës pritet të gëlltitet nga deti.

Plazhi Myrtos, i konsideruar si një nga plazhet më të bukura në të gjithë planetin, mund të zhduket plotësisht pasi të largohen 300 metra vijë bregdetare. Kjo është përmasat e “The Shard” të Londrës, rrokaqiellit të stilit Mordor të Renzo Pianos.

Fari egjiptian i Chania në Kretë, një tjetër simbol ikonik i Greqisë, do të zhduket gjithashtu deri në fund të shekullit nëse temperaturat vazhdojnë të rriten. Venecia e vogël në Mykonos mund të pushojë së ekzistuari, pasi deri në 195 metra erozioni bregdetar do të shkatërrojë një pjesë të madhe të qytetit në më pak se 80 vjet.

Ndërsa mund të ndiheni të pafuqishëm përballë statistikave të tilla, ka dy gjëra që mund të bëni me këtë informacion. Para së gjithash, ju mund të shkoni dhe të shihni këto plazhe mahnitëse para se të zhduken përgjithmonë. Por nëse duhet, sigurohuni që të udhëtoni atje në mënyrë të qëndrueshme, në mënyrë që të mos i shtoni një situatë tashmë kritike. Dhe së dyti, mund të përpiqeni të luani rolin tuaj në luftën për një botë më të mirë, më të qëndrueshme, ku këto plazhe spektakolare mund të kenë një mundësi për të mbijetuar.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.