Plotësimi i krediteve për mjekët – Gjatë qershorit 28 aktivitete me kosto deri në 100 mijë lekë
Edukimi në vazhdim është një domosdoshmëri për bluzat e bardha në kuadër të ofrimit të shërbimit sa më cilësor tek pacientët. Gjatë muajit qershor 2018, janë kryer rreth 28 aktivitetet nëpërmjet të cilave të gjithë pjesëmarrësit mund të siguronin kredite. Qendra Kombëtare e Edukimit në Vazhdim i ka monitoruar këto aktivitete të cilat kanë rezultuar brenda standardeve.
Konkretisht këto aktivitetet ishin 13 trajnime, 8 konferenca, 2 workshop dhe 5 seminare. Për të përfituar kreditet për mirëmbajtjen e licencës të gjithë punonjësit e shëndetësisë janë të detyruar që të paguajnë. Kostot për këto kredite mund të variojnë nga zero lekë në 100 mijë lekë për aktivitetet brenda vendit. Ndërsa për ato aktivitete që zhvillohen jashtë Shqipërisë kosto e tyre mund të jetë në disa qindra euro.
Përmbushje maksimale të standardeve të edukimit në vazhdim, gjatë këtij muaj kishin konferenca e Parë e Shoqatës së Mjekut të Përgjithshëm dhe Familjes të Shqipërisë. Si dhe Simpoziumi i dytë Ndërkombëtar i Ortodoncisë, organizuar nga Shoqata e Ortodontëve Shqiptarë. QKEV monitoron të gjitha aktivitete prej të cilave bluzat e bardha përfitojnë kredite për respektimin me rigorozitet të programit të aktivitetit, si dhe standardeve të tjera të cilësisë Në një fazë prej katër vitesh, mjekët duhet të plotësojnë 120 kredite, farmacistët 60 dhe infermierët 40 kredite.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.