Policë sigurimi e garanci 10 vjeçare nga ndërtuesit/ Cili është projekti i qeverisë për skemën e sigurimit të apartamenteve e pronave

Përmbytjet e shumta me të cilat po përballet vendi vitet e fundit, por edhe lëkundjet e forta të tërmetit kanë sjellë vazhdimisht diskutimet lidhur me nevojën për ta bërë të detyrueshëm sigurimin e banesave apo të bizneseve.

Tërmeti i 21 shtatorit duket se po çon në marrjen e masave konkrete në këtë drejtim. Masa e parë e paralajmëruar është ajo që parashikon detyrimin e një kontrate sigurimi 10 që ndërtuesit duhet të nënshkruajnë me blerësit. Në këtë kontratë sigurimi, ndërtuesit duhet të marrin përsipër mbulimin e dëmeve që rrjedhin për shkak të terrenit, difekteve në ndërtim apo që paraqesin rreziqe të tjera serioze.

Një ndryshim tjetër ligjor është që sjell përfshirjen e kompanive të sigurimit në procesin e ndërtimeve. Referuar asaj çfarë paralajmëroi kryeministri , lejet e ndërtimit për banesa kolektive si pallate apo hotele e ambiente tregtare, do të lidhen me policën e sigurimit.

Pra, nuk do të jepet më leje ndërtimi pa pasur policë sigurimi. Kjo policë sigurimi duhet të disponohet nga ndërtuesi, arkitekti e grupi i projektimi para nisjes së punimeve. Polica e sigurimit do të jetë pjesë e dosjes së dokumenteve që duhet të depozitohen për marrjen e lejes së ndërtimit.

Në këtë mënyrë, futet një mekanizëm i ri kontrolli përmes marrëdhënies me kompaninë e sigurimit. Kompania e sigurimit do të marrë përsipër që të garantojë blerësit dhe të garantojë edhe autoritetin që ka dhënë lejen se godina përputhet me atë çka është autorizuar leja e ndërtimit. Në të kundërt, të dyja palët si siguruesit ashtu edhe ndërtuesit do të paditen penalisht.

A mund të sjellë vendosja e detyrimit për policën e sigurimit rritje të çmimit të banesave në vend?

Sipas kryeministrit, “çmimi i jetës është i pakrahasueshëm” dhe përfitimet janë të shumta për qytetarët. Kjo, sipas kryeministrit, është një masë e përdorur gjerësisht në botë dhe mundëson rregullimin e problematikave të hasura ku shumë aparatmente të blera nuk regjistrohen dot në hipotekë dhe as përdoren si kolateral.

Kryeministri paralajmëroi se çështja e sigurimit të pronës do të marrë zgjidhje përmes përfshirjes në një sistem. Në këtë rast, ai përmendi përmbytjet e shumta që kanë ndodhur vitet e fundit dhe nevojën që banesat dhe bizneset të përfshihen në sistemin e sigurimeve me qëllim që arka e shtetit të mos paguajë më dëmshpërblime.

“Duhet të përfshihen të gjitha në një sistem sigurimesh siç e ka bota normale. Dhe kush dëmtohet, përtej gjithë dhimbjeve që ka dëmi për 1001arsye, së paku është i sigurt se do të marrë mbrapsht atë që ka humbur materialisht” shpjegoi kryeministri.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.