Policia sekuestron 360 mijë euro asete në Vlorë! Dyshohet se rrjedhin nga burime jo të ligjshme. Në listë apartamente, dyqane, parkime e garazhe
Policia njofton se në bashkëpunim me Prokurorinë kanë bërë sekuestrimin e disa pasurive që rrjedhin nga burime jo të ligjshme. Seksioni i Krimit Ekonomik e Financiar pranë Drejtorisë Vendore të Policisë Vlorë në vijim të punës hetimore në ngarkim të shtetasit J.J, si person i dyshuar për kryerjen e veprës penale “Pastrimi i produkteve të veprës penale ose veprimtarisë penale” parashikuar nga neni 287 i Kodit Penal, ka bërë ekzekutimin e urdhërit të Prokurorit në zbatim të vendimit penal, datë 17.11.2018, të Gjykatës së Shkallës së Parë Vlorë, e cila ka caktuar masën e sigurimit pasuror sekuestro preventive mbi pasuritë e mëposhtme :
-2 apartamente banimi në lagjen “10 Korriku” Vlorë
-2 ambiente shërbimi – dyqan, në lagjen “Pavarësia” Vlorë
-2 vende parkimi në lagjen “Pavarësia” Vlorë
-6 garazhe të ndryshme në lagjen “10 Korriku” Vlorë
-1 automjet tip BMW.
Sipas Policisë, vlera totale e këtyre pasurive arrin deri në 360.000 euro.
“Dyshohet se pasuritë e sekuestruara janë përfituar si pasojë e veprimtarive të shtetasit J.J në fushën e prodhimit dhe shitjes së lëndëve narkotike” njofton Policia.
Ndërkohë, Policia e Shtetit po vijon punën për gjurmimin, evidentimin dhe sekuestrimin e aseteve që rrjedhin nga veprimtari kriminale.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.