Policia shqiptare integrohet në BE! Çfarë është ENFAST, rrjeti ndërkombëtar për kapjen e të kërkuarve
Shqipëria është anëtarësuar zyrtarisht në Rrjetin Europian të Skuadrave për Gjetjen e Personave në Kërkim (ENFAST). Ministri I Brendshëm Sandër Lleshaj e ka cilësuar anëtarësimin si një tjetër hap me rëndësi drejt përfshirjes së Policisë së Shtetit në marrëdhënie të reja me strukturat europiane.
“Tashmë jo vetëm Policia jonë, por një rrjet i gjerë strukturash europiane do të jetë në mbështetje të përpjekjeve për kapjen e personave që i shmangen drejtësisë” shprehet ministri.
Por çfarë është ENFAST?
Në Policinë e Shtetit do të krijohet një strukturë e re, që në thelb do të përbëjë atë që mund të cilësohet si “integrim i policisë shqiptare në BE”.
ENFAST është rrjeti europian i njësive aktive të kërkimit të atyre që janë shpallur si persona në kërkim ndërsa FAST (Fugitive Active Search Team) janë njësitë e kërkimit. Projekti ENFAST ka si qëllim që të rrisë sigurinë në Bashkimin Europian, duke përmirësuar eficencën e bashkëpunimit të policisë të finalizuar me lokalizimin dhe arrestimin e kriminelëve të kërkuar në nivel ndërkombëtar dhe që kanë kryer krime të rënda.
Referuar shpjegimeve që jepen në faqen zyrtare, ENFAST është një rrjet operatorësh policorë, aktive 24 orë në 24, 7 ditë në 7, në gjendje që të veprojë menjëherë për lokalizimin dhe arrestimin e të kërkuarve. Projekti u prezantua në vitin 2012 dhe u miratua nga Këshilli Europian në vitin 2013.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.