Policia Shtetit inspekton portin e Durrësit – Bilanci i korrikut: Kanë hyrë 110 mijë shtetas mes të cilëve janë kapur 10 persona në kërkim dhe evidentuar 37 raste të paligjshmërisë
Drejtori i Përgjithshëm I Policisë së Shtetit Ardi Veliu në kuadër të inspektimit në pikat e kalimit kufitar, me qëllim përballimin e fluksit, parandalimin e azil kërkimit, si dhe rritjen e forcës goditëse ndaj paligjshmërisë, mëngjesin e sotëm ka inspektuar Portin e Durrësit ku ka theksuar se është prioritet kryesor i tërë organeve shtetërore përkatëse për të parandaluar të gjithë ata persona që kanë për qëllim largimin për të kërkuar azil në vendet e BE-së. Vetëm gjatë muajit korrik kanë hyrë 110 mijë shtetas shqiptarë dhe të huaj, me rreth 25 mijë mjete dhe kanë dalë rreth 32 mijë shtetas shqiptarë dhe të huaj me rreth 9 mijë mjete. Ndër ta janë arrestuar 10 persona në kërkim si dhe janë evidentuar 37 raste të paligjshmërisë.
Sipas policisë së Shtetit në këtë inspektim ai u ka kërkuar punonjësve të policisë në sportele që të jenë të angazhuar maksimalisht në shërbim të qytetarëve, dhe të ofrojnë një shërbim sa më cilësor dhe në kohë. Gjithashtu në njoftimin zyrtar thuhet se krahas masave të rrepta që po aplikohen qoftë në pikat e kalimit apo në patrullimet e shtuara në kufirin e gjelbër, Policia Shtetit po bashkëpunon ngushtësisht me partnerët, për të riatdhesuar të gjithë ata shtetas që kanë mundur të kalojnë kufirin për të kërkuar më pas azil në vendet e BE-së.
Gjithashtu Veliu ka diskutuar me drejtuesit e Policisë Kufitare, që të bashkëpunohet me Policinë italiane kryesisht në Bari, për të evidentuar dhe ndëshkuar të gjithë ata persona që shesin polica sigurimi false, nisur kjo edhe nga denoncimet e shtuara të qytetarëve, të cilët kanë blerë në portin e Barit nga shtetas shqiptarë, siguracion automjetesh të falsifikuar, vijon njoftimi.
Në mbyllje të inspektimit thuhet në publikimin e Policisë së Shtetit, Veliu ka kërkuar një vëmendje dhe kontroll të detajuar edhe në drejtim të parandalimit të trafikimit të lëndëve narkotike, duke bashkëpunuar ngushtësisht me Drejtorinë Vendore të Policisë Durrës, me shërbimet doganore dhe homologët italianë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.