Polonia, kritika ndaj BE – Shqetësohet për integrimin më të shpejtë të disa vendeve

Bashkimi Europian mund të shpërbëhet nëse disa anëtarë integrohen më shpejtë se të tjerët, thotë Presidenti i Polonisë, Andrzej Duda. Sipas tij, blloku duhet të jetë një “union me kombe të lira dhe të barabarta”.

Ndërsa Bashkimi Europian po merret me daljen e Mbretërisë së Bashkuar, rreziku më i madh është integrimi më i shpejtë i disa vendeve krahasuar me të tjerat.  Komentet e Presidentit vijnë pasi krahu ekzekutiv i Bashkimit Europian, ka kërcënuar për sanksione të ashpra kundër Polonisë, një ish vend komunist që iu bashkua bllokut në vitin 2004,  për shkak të cenimit të standardeve të demokracisë nga Qeveria dhe kontrollit më të fortë të gjyqësorit.

“Brexit nuk përbën rrezik për Bashkimin Europian. Një kërcënim më i madh është nëse Bashkimi Europian nis të shpërbëhet në blloqe ku disa janë më të fuqishme e që mund të vendosin për të tjerët”, tha presidenti.  Polonia shqetësohet se mund të humbasë influencë në BE, nëse një grup vendesh, si anëtarët e valutës së përbashkët, vendosin të integrohen më thellë.

Nga ana tjetër, për zyrtarët atje po bëhet më e vështirë që të gjejnë aleatë për të zbutur fuqitë e institucioneve të BE, në mënyrë që parlamentet kombëtare të kenë më shumë influencë në vendimmarrje.  Zv/kryeministri  Mateusz Morawiecki ka thënë se bizneset polake po diskriminohen kundrejt atyre në vendet perëndimore. Presidenti francez Emmanuel Macron foli gjatë muajit të kaluar për përfundimin e “dumping-ut social”, duke tërhequr kritika nga Varshava.

“Kur ne jemi drejt suksesit, partnerët e Bashkimit Europian vendosin limite në lëvizjen e lirë të shërbimeve, duke e quajtur dumping social”, tha zv/kryeministri.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.