Porti i Limionit në Sarandë nxirret për qira – Kontratë 20-vjeçare, nxit investimet

Porti i Limionit në Sarandë, i shpallur në vitin 2012 si i hapur për trafikun ndërkombëtar, është nxjerrë për qira nga qeveria shqiptare. Bëhet fjalë për objektin me sipërfaqe totale 5370 metra katrorë, i përdorur për përpunimin e mallrave që ngarkohen dhe shkarkohen në qytetin e Sarandës.

Ky port klasifikohet si ndër më të rëndësishmit në vendin tonë, ndërsa dhënia me qira e kësaj pasurie bëhet me qëllim dhënien në përdorim të saj. Afati i dhënie me qira është 20 vjet, ndërsa vlera dysheme për detyrimin është 229,200 lekë në muaj.

Marrja e këtij porti, tani në administrim të shoqërisë “Porti Detar” SHA, nga një operator i huaj do të mundësojë sipas qeverisë edhe nxitjen e investimeve për përmirësimin e infrastrukturës së portit, rritjen e cilësisë së shërbimeve të mirëmbajtjes së mjeteve detare lundruese dhe rritjen e punësimin e investimeve në zonën përreth.

Për të garantuar që këto investime do të kryhen, ofertat e konkurrentëve do të vlerësohen sipas një sistemi me pikë, ku investimi zë 40 pikë, punësimi 30 pikë dhe tarifa mujore e qirasë 30 pikë.

Konkurrimi është planifikuar në fund të këtij muaji, më 29 Mars 2018, pranë Ministrisë së Financave dhe Ekonomisë.

Dhënia me qira e këtij porti vjen në një moment kur volumi i mallrave të ngarkuara dhe shkarkuara në portet e vendit është në rritje. Megjithatë, 92.7% e këtij volumi procesohet në Portin e Durrësit, ndaj kryerja e investimeve mund të rrisë faktorin tërheqës të portit më jugor të vendit.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.