Portugalia do të rrisë pagën minimale në 635 euro, por mbetet ende më e ulëta në Evropën Perëndimore
Qeveria minoritare socialiste e Portugalisë paraqiti të Mërkurën një propozim për të rritur pagën minimale mujore me gati 6% në 635 euro vitin e ardhshëm, duke mbetur gjithsesi më e ulëta në Evropën perëndimore.
Kryeministri Antonio Costa premtoi të rrisë pagën minimale mujore me 25% në 750 euro deri në vitin 2023 kur filloi mandatin e tij të dytë në detyrë muajin e kaluar.
“Kjo trajektore kontribuon në rimëkëmbjen e të ardhurave dhe përmirësimin e niveleve të kohezionit social,” tha qeveria në plan – “Rritja ka përkuar me një dinamizëm të rëndësishëm në ekonomi dhe tregun e punës.”
Një në pesë punëtorë në Portugali janë në pagën minimale dhe statusi i punësimit të 890,000 njerëzve u përshkrua vitin e kaluar zyrtarisht si i pasigurt, një term i përdorur për t’iu referuar formave jo standarde të punësimit, duke përfshirë punën e përkohshme dhe kontratat me afat të caktuar.
Rritjet do të negociohen dhe rishikohen çdo vit derisa të arrijë objektivin 750 euro në 2023.
Midis 2015, kur Socialistët morën pushtetin dhe 2019, paga minimale u rrit me 14%, nga 505 në 600 euro, por norma është ende larg nga Spanja fqinje, e cila ka arritur kuotën e 1,050 eurove.
“Por, rritjet e pagave nuk kanë arritur ende ritmin e rritjes së nevojshme për të siguruar një shpërndarje të ekuilibruar të të ardhurave,” tha qeveria, duke shtuar që Portugalia “mbetet një nga vendet me nivelet më të larta të pabarazisë së të ardhurave në Bashkimin Evropian.”
Analistët e shohin pasigurinë e punës si një të metë të madhe të ekonomisë, e cila po gradualisht po përmirësohet pasi ekonomia portugeze regjistroi zgjerimin e saj më të fortë në pothuajse dy dekada në vitin 2017 dhe u rikuperua nga një deficit buxhetor që kërkoi nevojën e fondeve ndërkombëtare.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.