Posta Shqiptare, 585 mln lekë të ardhura në 3-mujorin e parë – Dominon shërbimi financiar dhe bankar
Gjatë 3 muajve të parë të vitit, Posta Shqiptare gjeneroi rreth 585.6 milionë lekë të ardhura, duke tejkaluar pritshmëritë me 3.5%, por duke qëndruar lehtë nën rezultatin e vitit të kaluar. Të ardhurat nga shërbimet postare ishin nën vlerat e programuara, por shërbimet financiare dhe bankare ndihmuan kompaninë të rrisë qarkullimin e saj.
Këto shërbime që përfshijnë arkëtimet e faturave të ndryshme të energjisë, ujit, gjobave, taksave dhe shërbimeve të tjera bankare tejkaluan parashikimet me 12.1%, duke realizuar të ardhura prej 242 milionë lekësh. Tashmë shërbimet financiare dhe bankare janë konfirmuar si segmenti kryesor i Postës Shqiptare.
Kombinuar me një reduktim të shpenzimeve në masën 92.9% të buxhetit të planifikuar, Posta realizoi për periudhën Janar-Mars një fitim prej 33.1 milionë lekësh. Megjithatë duhet theksuar se ky fitim është ulur ndjeshëm krahasuar me të njëjtën periudhë të vitit të kaluar, kur bilanci pozitiv ishte 53.6 milionë lekë.
Gjatë një aktiviteti të organizuar me rastin e 105-vjetorit të emetimit të pullës së parë shqiptare, administratori i kompanisë, Laert Duraj, njoftoi objektivin për rritjen e të ardhurave me 10% në çdo shërbim të ofruar. Aplikuar në këtë tremujor, një rritje e të ardhurave në këtë masë do të rriste fitimin në 91.7 milionë lekë, duke lejuar edhe më shumë shpenzime për nevojat e Postës Shqiptare.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.