“Pozitiviteti i testeve covid, Tirana në fund” – Alimehmeti: Më keq janë Fieri, Vlora e Elbasani, por testohet shumë pak
Pavarësisht se Tirana regjistron çdo ditë numrin më të lartë të të infektuarve me COVID-19, sipas mjekut epidemiolog Ilir Alimehmeti ajo renditet e fundit, nëse mbahet parasysh numri i testimeve. Sipas tij, nëse shikohet pozitiviteti i testimeve, pra sa testime dalin pozitive për çdo 100 testime, Tirana zë pikërisht vendin e fundit. Sipas përllogaritjeve, Qarku i i Fierit renditet në vendin e parë, me 64.7% pozitivitet të testimeve, ndërsa pas tij vijnë Vlora me 56.2% dhe Elbasani me 49%. Berati, Lezha dhe Korça janë qarqet që vijnë më pas, duke u renditur më keq se Shkodra, Gjirokastra, Dibra e Kukësi.
Praktikisht, sipas të dhënave, Qarku i Tiranës renditet në fund të listës me 14.6% të pozitivitetit të testimeve dhe me një diferencë të lartë nga qarqet e tjerë. Mjeku i shoqëron të dhënat edhe me numrin mesatar të testimeve në periudhën 20 janar-24 shkurt 2021, ku sipas tij tregohet një pabarazi e jashtëzakonshme, kryesisht për shkak të fuqisë socio-ekonomike të Tiranës. Sipas këtyre shifrave, që janë marrë nga Ministria e Shëndetësisë, në Tiranë kryhen mesatarisht 2500 testime në ditë, ndërsa qarqet e tjerë rezultojnë me shumë më pak testime. Berati, Kukësi dhe Dibra renditen në fund të kësaj liste.
Për këtë arsye, sipas mjekut epidemiolog është shumë e rëndësishme rritja e numrit të testimeve. “Strategjia “test, test, test” ka qenë gjithnjë e trumbetuar nga OBSH-ja, por në Shqipëri kjo vazhdon nuk kryhet masivisht”,-komenton mjeku. Me herët ekspertët kanë argumentuar se rritja e numrit të testimeve shërben jo vetëm për të shkëputur zinxhirin e infeksionit, por edhe për zbulimin e hershëm të sëmundjes, duke mundësuar edhe trajtimin në kohën e duhur.
Ola Mitre / SCAN
Numri mesatar i testimeve (20 janar – 24 shkurt 2021)
Tirana – 2.500 testime ditore
Durrësi – 170 testime ditore
Fieri – 153 testime ditore,
Elbasani – 131 testime ditore,
Vlora – 122 testime ditore,
Shkodra – 120 testime ditore,
Korça – 112 testime ditore,
Lezha – 95 testime ditore,
Gjirokastra – 89 testime ditore,
Berati – 80 testime ditore,
Kukësi – 77 testime ditore,
Dibra – 73 testime ditore.
Pozitiviteti i testimeve sipas qarqeve
Fieri 64.7%
Vlora 56.2%
Elbasani 49.0%
Berati 48.6%
Lezha 40.1%
Korça 39.8%
Durrësi 37.6%
Shkodra 33.8%
Gjirokastra 33.6%
Dibra 27.7%
Kukësi 22.2%
Tirana 14.6%
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.