PPP për infrastrukturën shkollore, Veliaj: Historia e shkollave me dy turne në Tiranë do të mbarojë
Bashkia e Tiranës do të vijojë punën për përmirësimin e infrastrukturës për çerdhet, kopshtet dhe shkollat. Gjatë analizës vjetore të Qendrës Ekonomike të Zhvillimit dhe Edukimit të Fëmijëve për vitin 2016 dhe objektivat e 2017, Veliaj vlerësoi përkushtimin dhe punën e kryer nga stafi i punonjësve të kësaj drejtorie në zhvillimin dhe edukimin e fëmijëve. Duke e cilësuar vitin që kaloi si mjaft të mirë për Bashkinë e Tiranës, kryebashkiaku u shpreh optimist se me përmirësimin e situatës financiare, do të shihet mundësia për të rritur trajtimin financiar për të gjithë ata që punojnë në çerdhe apo kopshte
“Di që ka qenë një vit i mirë për bashkinë dhe më vjen mirë që sadopak jemi munduar që ta respektojmë këtë gatishmëri dhe këtë etikë që ka organizata jonë, në terma të punës. Më vjen mirë që me shëndoshjen financiare të Bashkisë, patëm mundësi që të bënim një rritje të parë të rrogave për të gjithë edukatoret dhe gjithë punonjësit tanë në shërbimet e fëmijëve dhe jam shumë shpresëplotë që nëse bashkia do të vazhdojë me këto ritme, do mund ta rrisim edhe më shumë shpërblimin financiar”, u shpreh ai.
Kryebashkiaku deklaroi se brenda një kohe të shkurtër është bërë i mundur përmirësimi i infrastrukturës në çerdhe dhe në kopshte, kjo falë politikave të duhura. “Kur po shikoja shifrat e arkivës së bashkisë, vura re se në vitin 2014 ishin rikonstruktuar vetëm 2 çerdhe dhe 3 kopshte. Kurse ne në 1 vit bëmë respektivisht 27 dhe 31. Pra, në 1 vit ritmin e kemi 10 herë më të lartë. Unë besoj se nuk duhet ta ulim këtë ambicie. Nga tani mund të jemi 10 herë më mirë se ata që ishin përpara nesh, por nga tani matemi me veten tonë”, pohoi Veliaj.
Sikurse u veprua me ndërtimin e 31 çerdheve dhe 27 kopshteve, Veliaj garantoi se do të vijojë puna për ndërtimin e shkollave të reja për të krijuar të gjitha kushtet e nevojshme për nxënësit. “Bashkë me Kryeministrin dhe ministren e Arsimit filluam një operacion, ndoshta më të madhin në infrastrukturën shkollore. Plani që shpalosëm dje është që të shkojmë në një partneritet publik – privat. Ajo që po themi është shpenzojmë të njëjtin buxhet vjetor, por në vend që shkollat t’i ndërtojmë një nga një, t’i bëjmë të gjitha përnjëherë. Nëse do të vazhdonim me ritmin që punonte administrata e kaluar, mua do të më duheshin 8 mandate për të ndërtuar 20 shkolla”.
Veliaj deklaroi se kjo lloj formule e zgjedhur nuk do të rëndojë financat e Bashkisë dhe nuk do të pengojë kryerjen e investimeve të nevojshme për qytetin. Ai shprehu bindjen se falë projekteve të tilla, do të marrë fund edhe mësimi me dy turne. “Do të shpenzojmë ekzaktësisht sa shpenzojmë çdo vit, por në vend që të bëjmë nga një shkollë në vit, atë fond do ta përdorim si këste për t’i pasur të 20 shkollat përnjëherë dhe pastaj në momentin që i kemi shkollat, paguajmë këstet. Por historia e 57 shkollave me dy turne në Tiranë duhet të mbarojë”.
Gjithashtu, Veliaj komentoi edhe çështjen e rikthimit të dhënies së bursave për nxënësit ekselentë pas një ndërprerje të gjatë. “Kam një kënaqësi të jashtëzakonshme nga fakti se kemi rikthyer bursat për nxënësit e mire, e cila gjithashtu menaxhohet nga Qendra jonë e Zhvillimit Ekonomik të Fëmijëve. Ndjehem mirë jo se këto bursa janë shpëtimi për familjet, por është një mënyrë se si shoqëria jonë i trajton njerëzit ndryshe. Më vjen mirë që për 2228 fëmijë dhamë nga 450 mijë lekë për secilin, të nënta këstet përnjëherë, të cilat për katër vite ishin harruar”, tha Veliaj, duke shtuar se të rinjtë janë bekim dhe garanci për të ardhmen e qytetit.
Kryebashkiaku foli edhe për transportin publik, ku theksoi se është përmirësuar flota dhe janë hapur disa linja të reja udhëtimi. Ai komentoi idenë e Bashkisë së Tiranës për të lehtësuar fluksin e qytetarëve për transportin publik, ku mund të bëhet një përshtatje e orareve të fillimit të punës nga institucionet e ndryshme, publike dhe private. “Ashtu siç kemi bërë me çerdhet dhe kopshtet, kur i paraprimë fluksit të orës 7 me 8, që është fluksi më i madh, duke i filluar respektivisht në 6:30 dhe 7, do të duhet ta bëjmë këtë edhe me institucionet e tjera. Ndoshta, edhe me shkollat private ose me shumë prej ministrive apo agjencive të ndryshme. Vërtet e kemi shtuar numrin e autobusëve nga 200 në 290 mjete, por nëse mbi 100 mijë njerëz dalin në të njëjtën kohë për të filluar aktivitetin e tyre, në të njëjtën orë nuk ka metro, tren, nuk ka autobusë që e përballon këtë. Ndaj është e rëndësishme që ashtu siç vendosëm për çerdhet dhe kopshtet, oraret 6:30-7:00, ashtu të vendosim edhe për institucionet e tjera si një mënyrë për ta kalendarizuar dhe për ta shpërndarë fashon orare të fluksit të mëngjesit”.
Veliaj theksoi se Bashkia e Tiranës po monitoron me rigorozitet operatorët edhe me GPS, ndërsa lajmëroi nisjen e punës për instalimin e kamerave që do të rrisin sigurinë në transportin publik.
Osman Dedja/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.