“PPP-të”, financim në Bursë? Ekspertët: Shans për tregun e kapitalit
“Platforma 1 miliard euro”, e prezantuar nga qeveria shqiptare mund të jetë një mundësi për të aktivizuar tregun e kapitalit në Shqipëri. Elvin Meka, ekspert i tregjeve financiare dhe administrator i Shkollës së Lartë Universitare “Luarasi”, thotë në një intervistë për Tv Scan se bankat nuk duhen parë si alternativë e vetme për financimin e këtyre projekteve.
Sipas tij, koincidenca me hapjen e Bursës së parë private është një shans i mirë për të provuar sigurimin e financimeve përmes instrumenteve të këtij tregu. Ai është i mendimit se, sipërmarrjet të cilat do të fitojnë kontratat për këto projekte, mund të provojnë shumë mirë që një pjesë të financimeve t’i sigurojnë përmes emetimit të obligacioneve.
Zoti Meka është i mendimit se financimi i këtyre projekteve nga bankat do të kërkojë analizë rast pas rasti dhe nuk duhet parë aspak si një formalitet.
Me gjerësisht, ai është i mendimit se platforma e ashtuquajtur 1 miliard euro bart rreziqe të konsiderueshme në afatin e gjatë. Ndonëse në vitet e para injektimi i sasive të mëdha të parasë në ekonomi do të ketë ndikime pozitive në ekonomi, efekti i shpenzimeve shtesë që ato do të sjellin në buxhet mund të jetë shqetësues. Rritja e shpenzimeve buxhetore mund të bëhet një barrë e papërballueshme për buxhetin dhe do të kërkojë masa shtrënguese dhe rritje eventuale të taksave për shqiptarët.
Në funksion të stimulit për ekonominë, zoti Meka mbështet sinjalet e Bankës së Shqipërisë për zgjatjen e stimulit monetar edhe për vitin e ardhshëm. Sipas tij, qëndrueshmëria e rritjes ekonomike të vendit do të arrihet vetëm kur të kemi një përtëritje të mirëfilltë të nismës private dhe rritje të konsumit të brendshëm.
Në vitet e fundit, rritja e ekonomisë shqiptare është mbështetur nga rritja e investimeve, të përqendruara në pak projekte madhore. Përparimi i këtyre projekteve drejt mbylljes ka sjellë dilema lidhur me burimet e rritjes së ekonomisë shqiptare në vitet në vazhdim. Vetëm FMN ka ulur projeksionet për rritjen ekonomike, duke nisur nga viti i ardhshëm, pikërisht sepse projekti TAP ka arritur pikun, ndërsa sektori privat i ekonomisë shqiptare ende nuk është plotësisht i rimëkëmbur.
Qeveria do të tentojë të japë stimuj përmes paketës së investimeve me partneritet publik-privat, por ende nuk është e qartë sa e suksesshme do të jetë në këtë nismë, duke filluar nga gjetja e financimeve. Për të mbështetur forcimin e kërkesës private, Banka e Shqipërisë ka përcjellë sinjale për zgjatje të stimulit të lartë monetar edhe vitin e ardhshëm, pa përjashtuar madje një rritje të mëtejshme të këtij stimuli.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.