Praktika e punës në shtet – Zv/ministrja e Arsimit: Aplikuan 3000 të rinj, 950 plotësuan kriteret

Rreth 950  nga 3000 të rinj që aplikuan për t’u bërë pjesë e Programit Kombëtar të Praktikave të Punës plotësuan kriteret për të marrë eksperiencë në institucionet shtetërore dhe kompanitë private”. Të dhënat bëhen me dije nga ministrja e Arsimit, Sportit dhe Rinisë, Lorena Haxhiu, në një prononcim dhënë për TV SCAN.

“Aplikimet kanë arritur në një numër prej rreth 3 mijë aplikantësh dhe sot që ne flasim kemi plot 951 të rinj që janë të sistemuar në këto institucione dhe që po zhvillojnë praktikën për të përmbyllur në muajin qershor fazën e parë dhe më pas për ti hapur rrugën punësimit të tyre. Pasi ashtu sikurse dihet VKM thotë që  200 prej këtyre të rinjve që janë duke zhvilluar praktikën në ministritë e linjës dhe institucionet në varësi të tyre do të punësohen ndërsa pjesa tjetër për sa i takon shoqërive tregtare dhe bashkive pra e kemi të shtrirë në 51 bashki do të shikojmë mundësitë për sa i takon vendeve vakante për ti hapur dhe vendosur në dispozicion këtyre të rinjve.” – tha zv/ministrja.

Sipas Haxhiut, Programi i Praktikave të Punës do të vijojë edhe në vitet në vijim, duke u zgjeruar në varësi të dinamikave të tregut të punës.

“Ne do të vijojmë akoma ta zgjerojmë në varësi edhe të dinamikave të tregut të punës pasi ajo që vihet re është shtrirja territoriale që i kemi vendosur programit gjatë këtij viti pra të thuash 51 bashki nuk është pak, dhe nga ana tjetër ne pretendojmë që edhe të zgjerohet edhe për sa i takon diversifikimit në pozicione pune pasi tregu është gjithmonë e më shumë i ndryshueshëm drejt atyre profesioneve që mund të konsiderohen profesione të reja.” -tha Haxhiu.

Ndërkaq, zëvendësministrja inkurajon të rinjtë që nuk arritën të bëhen pjesë e programit,  të aplikojnë në vitet në vijim.

“Ne i inkurajojmë që të marrin pjesë vitin e ardhshme apo të marrë pjesë në një insititucion tjetër që përshtatet me profilin e tij studimor edhe me pozicionin e kërkuar të praktikës”– përfundoi ajo.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.