Pranë firmosjes kontrata për rrugën e Torovicës, kryeministri: Për Shëngjin-Velipojë, dakordësi me Malin e Zi për ndërtimin e urës së Bunës
Punimet për rindërtimit të aksit të vjetër kombëtar që lidhte Shkodrën me Lezhën e që njihet ndryshe edhe si rruga e Torovicës, parashikohet të nisin pas pak ditësh. Lajmi u bë i ditur nga kryeministri Edi Rama në një takim të zhvilluar në Lezhë. Kryeministri tha se shumë shpejt do të nënshkruhet kontrata që i hap rrugë rindërtimit të aksit rrugor që jo vetëm zgjidh problematikën e banorëve të zonës por edhe mund të ringjallë aktivitetin bujqësor të saj.
Një projekt tjetër i njoftuar nga kryeministri ishte edhe rruga Shëngjin-Velipojë që jo vetëm lidh dy plazhet por edhe mundëson një lidhje direkte me Malin e Zi. Kryeministri e cilësoi këtë si një aks strategjik dhe tha se është rënë dakord me qeverinë e Malit të Zi për ndërtimin e Urës mbi lumin Buna në Shkodër.
“Kjo rrugë është një aks strategjik për zhvillimin e turizmit dhe për një lidhje direkte jo vetëm mes Lezhës dhe Shkodrës, por për të mundësuar edhe një zhvillim të turizmit në këtë brez edhe me Malin e Zi. E kemi diskutuar edhe në takimin e dy qeverive për të ndërtuar bashkërisht edhe urën mbi Bunë dhe për t’i dhënë një lëvizje të drejtëpërdrejtë turistëve në të dy anët duke sjellë një fluks edhe më të madh të tyre. Kjo do të jetë një nga rrugët më të bukura të Shqipërisë” tha kryeministri.
Një aks tjetër rrugor që u përmend ishte edhe ai Milot-Balldren, që do të ndërtohet me Partneritet Publik-Privat. Sa i përket këtij aksi, kryeministri tha se procedurat janë në përfundim.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.