Pranimet në universitete, Janaqi: Nga e marta nisin regjistrimet, që do të jenë në 7 faza
29 gusht deri në 11 shtator do të jetë afati i vënë në dispozicion për regjistrimin e maturantëve të shpallur fitues në raundin e parë për të vijuar studimet e larta . Në një deklaratë për mediat zëvendësministri i Arsimit, Gert Janaqi sqaroi se regjistrimi i do të kryhet në 7 faza 48 orëshe.
Ndërkohë rektori i universitetit të Tiranës Mynyr Koni bëri me dije degët ku kërkesat nga ana e aplikantëve kanë qenë më të larta.
Duke filluar që nga dita e martë aplikantët do të kenë mundësinë të informohen për mundësit e tyre , përmes portalit të maturantit e- Albanian .
Njoftimi i MAS
Procesi i regjistrimit të aplikantëve në Institucionet e Arsimit të Lartë (IAL) gjatë raundit të parë për vitin akademik 2017-2018 ( 29 gusht-12 shtator 2017)/ Portali UAlbania.
MAS informon të gjithë aplikantët se gjatë ditës së sotme, të datës 28 gusht 2017 të gjitha institucionet e arsimit të lartë duke përfshirë dhe ato që kanë zhvilluar konkurse dhe testime, do të afishojnë dhe publikojnë listat e renditjes duke përdorur si element identifikimi vetëm ID e aplikantëve.
MAS falenderon të gjithë rektorët, dekanët dhe stafet e universiteve publike dhe jo publike për punën e deritanishme dhe seriozitetin e treguar në këtë raund të parë aplikimesh të pranimeve në universitet.
Po sot, universitetet janë duke përcjellë zyrtarisht një kopje elektronike të listave në Qendrën e Shërbimeve Arsimore. Një kopje elektronike e listave do të ngarkohet në portalin U Albania http://ualbania.arsimi.gov.al/.
Nga data 29 Gusht – 11 shtator 2017 do të vijojë procesi i regjistrimit të aplikantëve në IAL. Kjo periudhë kohore do të jetë e ndarë në 7 faza 48 orëshe.
Portali U Albania do të aktivizohet ditën e nesërme në datën 29 Gusht 2017. Portali i siguron çdo maturanti akses për të ndjekur online në kohë reale ecurinë e procesit të shpalljes fitues në njërin apo disa prej programeve të studimit nga ato që ka përzgjedhur gjatë 7 fazave 48 orëshe. Hyrja në portalin U Albania mund të aksesohet vetëm nëpërmjet ID së maturantit.
MAS dhe QSHA kanë publikuar në faqet zyrtare www.arsimi.gov.al dhe www.qsha.gov.al një udhëzues teknik dhe një video promovuese se si monitorohet procesi i shpalljes së fituesve.
Në momentin kur shpallet fitues aplikanti duhet të paraqitet pranë IAL ku dëshiron të regjistrohet, brenda afatit 48 orësh. Nëse aplikanti nuk regjistrohet brenda këtij afati 48 orësh, humbet të drejtën e regjistrimit në ato programe studimi ku ishte shpallur fitues në atë fazë.
MAS njofton të gjithë maturantët të cilët:
• nuk kanë arritur të aplikojnë në raundin e parë.
• kanë kryer proces aplikimi online në raundin e parë dhe nuk janë shpallur fitues.
• kanë kryer procesin e aplikimit online në raundin e parë dhe nuk kanë arritur të regjistrohen.
• janë çregjistruar pas përfundimit të raundit të parë.
se do të kenë mundësi për rifilluar procedurat e aplikimit në raundin e dytë të regjistrimit në periudhën 15-22 Shtator 2017.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.