Pranverë e “nxehtë” në Itali – Do të “gëlojnë” grevat, më 24 mars ndalet edhe “blue panorama”
Duket se nuk do të jenë temperaturat që do të nxehin stinën e pranverës në Itali. Marsi projektohet të jetë një muaj mjaft i vështirë, jo vetëm për shkak të politikës dhe negociatave për të formuar një koalicion qeverisës.
Gjatë muajit të parë të pranverës parashikohen edhe një sërë grevash të njëpasnjëshme. Dita e parë e kësaj stine të nxehtë politike, si nga partitë ashtu edhe nga sindikatat do të jetë pikërisht 8 marsi.
Në këtë datë do të protestojnë si shkollat e shëndetësia, ashtu edhe transporti dhe telekomunikacioni.
Të Enjten parashikohet kështu greva e parë e përgjithshme. Tjetër datë e nxehtë që duket se do të paralizojë të gjithë vendin do të jetë 23 Marsi, kryesisht në sektorin e arsimit dhe të shëndetësisë.
Probleme do të ketë edhe në datë 7 dhe 22 mars si dhe ditë të tjera në qytete të ndryshme të Italisë. Në datë 13 mars ndërkohë do të protestojnë avokatët italianë.
Në datë 24 mars ndërkohë do të protestojnë edhe pilotët si dhe asistentët e fluturimit të “Blue Panorama”, duke e paralizuar kështu tërësisht kompaninë e fluturimit që ka një prezencë të konsiderueshme edhe në tregun shqiptar të fluturimeve pasi zë pjesën dërrmuese të itinerareve me fqinjët me disa udhëtime në ditë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.