Prefektja e Qarkut Tiranë: Don Bosko, zona ku u krijua më shumë panik
Gjatë takimit të zhvilluar mëngjesin e së dielës me kryeministrin Rama, drejtues të Ministrisë së Mbrojtjes, Ministrisë së Brendshme, Emergjencës Civile, Rezervës së Shtetit dhe prefektëve të vendit, prefektja e Qarkut Tiranë, Suzana Jahollari raportoi se deri më tani, janë numëruar 187 banesa me dëmtime, prej të cilave, 20 janë pallate me çarje. Sipas Jahollarit, ndërtesat që kanë pësuar më shumë dëme janë ato që i përkasin ndërtimeve përpara viteve ’90.
“Në stadiumin Dinamo kanë dalë mbi 100 veta të trembur, në panik dhe duke parë që paniku ishte më i lartë se pasojat reale, komisioni i emergjencave vendosi që të bënte diçka ndryshe nga herët e tjera.
Përveç qendrave sociale, menduam të ngrinim çadra afër zonave. Pjesa më e madhe donin të rrinin aty, ofruam batanije, ujë. Tek stadiumi Dinamo 4 çadra, në Don Bosko, 6 çadra. Don Bosko ishte zona më me shumë panik” u shpreh prefektja e Qarkut Tiranë.
Jahollari tha se në total u ngritën 19 çadra, të cilat shërbyen për të krijuar një efekt psikologjik, për shkak se njerëzit nuk pranonin të shkonin në qendrat sociale.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.