Premtimet për punësimin – Në një dekadë, numri i të punësuarve ka rënë
Rritja e punësimit është një nga temat qendrore të fushatave elektorale dhe nuk janë as zgjedhjet e para kur forcat politike premtojnë shifra të bujshme, prej disa qindra mijëra vendesh pune.
Partitë në programet e tyre nuk japin ndonjë argumentim të detajuar të mënyrës sesi do t’i krijojnë vendet e punës dhe si kanë arritur ta llogarisin, konkretisht, shifrën që premtojnë.
Argumentet ngelen te parimet e njohura teorike, sipas të cilave punësimi do të rritet nga shtimi i investimeve, rritja e incentivave dhe ulja e taksave, por pa një llogaritje të detajuar financiare. Sidoqoftë, pa paragjykuar më shumë premtimet elektorale, mjafton të hedhim një vështrim të shpejtë në treguesit e punësimit gjatë dekadës së fundit, kur të tre forcat politike kryesore kanë qenë në qeverisje.
Duke ju referuar statistikave zyrtare të INSTAT, në vitin 2007, numri i të punësuarve në ekonominë shqiptare ishte afërsisht 1.2 milionë. Ndërkohë, po të shohim të njëjtën statistikë, mbështetur në të njëjtin publikim, atë të tregut të punës, për vitin 2016, numri i të punësuarve ishte 1.16 milionë.
Pra, rezulton që gjatë dekadës së fundit, të mbushur me premtime elektorale të bujshme, në ekonominë shqiptare kemi afërsisht 40 mijë të punësuar më pak. Në vitin 2007, INSTAT e raportonte shkallën e punësimit në ekonomi në afro 57%, ndërkohë që në vitin 2016 ky tregues ishte rreth 49%.
Megjithatë debatin e përhershëm rreth besueshmërisë së statistikave, kartë që përdoret nga forcat politike sa herë që shifrat jua nxjerrin llogaritë gabim, tendenca duket e qartë. Në afatin e gjatë, nuk ka asnjë evidencë në statistikat zyrtare për rritje të bujshme të punësimit, siç premtojnë forcat politike sa herë që vijnë zgjedhjet.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.