Presidenti Meta dekreton anëtarin e 6-të të Gjykatës Kushtetuese, ambasadorja Kim: “Hap përpara për popullin shqiptar”
Presidenti Ilir Meta ka emëruar anëtarin e 6-të të Gjykatës Kushtetuese Përparim Kalon. Duket se mes Aleksandër Tomës e Përparim Kalos, Presidenti ka zgjedhur këtë të fundit.
Kalo bëhet dhe anëtari i 6-të i Gjykatës Kushtetuese dhe zyrtarisht kjo Gjykatë është funksionale pasi ka përmbushur kushtin minimal të funksionimit apo kuorimin prej 6 anëtarësh.
Në bazë të renditjes nga KED, Përparim Kalo kishte 90.29 pikë, dhe qëndronte më lart në listë se Aleksandër Toma që ka 75.57 pikë.
Në dekret Meta shkruan se vendosi ta dekretojë Përparim Kalon si anëtar të Gjykatës Kushtetuese pasi u njoh me praktikën dokumentare të miratuar nga KED si dhe duke vlerësuar nevojën jetike që ka vendi për plotësimin e funksionimin e Gjykatës Kushtetuese.
Gjykata Kushtetuese tashmë ka 6 anëtarët: Vitore Tusha, Marsida Xhaferllari, Fiona Papajorgji, Elsa Toska, Altin Binaj dhe i fundit Përparim Kalo. Kujtojmë se kjo Gjykatë kishte prej më thuajse 3 vitesh që nuk ishte funksionale.
Lajmin e ka përshëndetur edhe ambasadorja amerikane Yuri Kim, e cila i kishte bërë thirrje të forta palëve për të ngritur sa më shpejt Gjykatën, si një nga dy kushtet kryesore që Bashkimi Europian i ka vendosur vendit tonë për të vazhduar procesin e hapjes së negociatave.
Në Twitter ambasadorja shkruan: “Urime Popullit shqiptar. Ky është një hap gjigand përpara.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.