Presidenti për Kolegjin zgjedhor – Meta: Gjyqtarët nën shantazh, Dekretin për votimet e shqyrton vetëm Kushtetuesja

Për Presidentin e Republikës, Ilir Meta, vendimi i Kolegjit Zgjedhor që la në fuqi votimet e 30 qershorit, është i pavlefshëm dhe nuk ka asnjë efekt juridik në dekretin e tij për anulimin e zgjedhjeve.

Në një konferencë për shtyp të mbajtur në orën tetë të mëngjesit, Meta tha se është më se e qartë që vendimi është marrë nga gjyqtarët e Kolegjit nën kushtet e presionit dhe shantazhit, Gjithsesi, ai nënvizoi se dekreti i presidentit për zgjedhjet është marrë në mbështetje të plotë me Kushtetutën, për pasojë vetëm gjykata Kushtetuese mund të shqyrtojë atë.

Lidhur me këmbënguljen e mazhorancës për të zhvilluar pa opozitën zgjedhjet më 30 qershor, Meta tha se nuk do të ndërhynte për të ndaluar ato që i quajti zgjedhje partiake.

Pavarësisht akuzave nga mazhoranca dhe nisjes së procesit të shkarkimit, Meta shprehu vendosmërinë, se nuk do të lëvizë nga Presidenca pa mbaruar mandatin, madje shtoi se nga institucioni që drejton do të fillojë ringritja e Republikës.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.