Presidenti Radev fiton mandatin e dytë – Bullgari, votuesit mbështetin bindshëm premtimet e tij kundër korrupsionit
Presidenti bullgar, Rumen Radev, fitoi një mandat të dytë me diferencë të madhe në zgjedhjet e ditës së Diel, ndërkohë që votuesit në shtetin më të varfër të Bashkimit Europian, mbështetën premtimet e tij të forta kundër korrupsionit. Radev, 58-vjeç, mposhti sfiduesin Anastas Gerdzhikov, gjitashtu 58, me 66% të votave kundër 32%, në garë e dytë, pasi fitoi edhe në raundin e parë më 14 Nëntor, sipas sondazheve që regjistruan një pjesëmarrje rekord të ulët në votim. Zgjedhjet erdhën prej pakënaqësive të mëdha kundër një ryshfeti të nivelit të lartë që përfundoi qeverisjen 10-vjeçare të ish-kryeministrit Boyko Borissov në muajin Prill dhe solli fitoren e një partije të re kundër korrupsionit në zgjedhjet parlamentare të javës së kaluar.
“Ka përfunduar një muaj i jashtëzakonshëm politik me dy lloj zgjedhjesh që theksuan bindshëm dëshirën e njerëzve për ndryshim, për të luftuar korrupsionin, vjedhjet dhe hequr mafian nga pushteti”- tha Radev pas votimit. Posti i presidentit është kryesisht ceremonial, por ofron një platformë të fuqishme për të influencuar opinionin politik. Presidenti merr në kontroll situatën në periudha të krizave politike, kur kreu i shtetit mund të caktojë një kabinet të përkohëshëm. Radebv, një ish-komandant i forcave ajrore, fitoi popullaritet në protestat kundër Borissov në vitin 2020, dhe për caktimin e qeverive të përkohëshme që hodhën dritë tek marrëveshjet e errëta të prokurimeve publike të kabinetit të qendrës së djathtë të Borissov. Ky i fundit i ka mohuar akuzat.
Gerdzhikov, rektor i Universitetit të Sofjes, i mbështetur nga partia e Borissov, pranoi mposhtjen dhe shprehu keqardhje për dështimin që të bindë bullgarët se ai mund të bashkojë kombin. Dy sipërmarrësit e shkolluar në Harvard, që Radev emëroi në muajin Maj si ministra të përkohëshëm, kanë krijuar partinë “Ne vazhdojmë ndryshimin”, që fitoi zgjedhjet e treta kombëtare të Bullgarisë këtë vit më 14 nëntor, me premtimin për “zero korrupsion”.
Në fjalët e para pas votimit, Radev i’u drejtua partive, duke i bërë thirrje që të formojnë një qeveri dhe të nisin me vrull reformat e gjyqësorit, luftojnë pandeminë dhe marrë pasa për të mbrojtur njerëzit e cënuar nga kostot e larta të energjisë. Radev ka konfirmuar edhe një herë veton që po mban peng zhvillimin e konferencës së parë ndërqeveritare për Maqedoninë e Veriut dhe Shqipërinë, duke deklaruar se “qeveria e re nuk duhet të bëjë lëshime nga pozitat nacionale sidomos kur bëhet fjalë për identitetin dhe historinë bullgare dhe të drejtat e bashkatdhetarëve tanë prapa kufirit”.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.