Presidenti i sapozgjedhur i Asamblesë Parlamentare të KiE pranon ftesën për të vizituar Shqipërinë
Delegacioni shqiptar në Asamblenë Parlamentare të Këshillit të Evropës u prit në një takim të veçantë nga Presidenti i sapozgjedhur i Asamblesë, Michele Nicoletti, deputet italian i Grupit Socialist.
Gjatë takimit kryetari i delegacionit shqiptar, Ervin Bushati e përgëzoi Nicoletti për detyrën e re duke i shprehur mbështetjen e delegacionit shqiptar në Këshillin e Evropës.
Në takim u diskutua mbi rolin e rëndësishëm që ka luajtur dhe vijon të luajë KiE edhe Asambleja, si pjesë e saj, në drejtim të promovimit e forcimit të standardeve demokratike në Shqipëri, dhe në gjithë rajon. Në këtë kontekst, u nënvizua, kontributi i KiE për përmbushjen e rekomandimeve në kuadër të procesit të integrimit evropian të Shqipërisë, dhe rritjes së paqes dhe sigurisë në rajon.
Pjesë e diskutimeve gjatë takimit ishin edhe zgjedhjet parlamentare të vitit 2017, reforma në drejtësi dhe vijimi i implementimit të saj.
Gjithashtu, u trajtua mbështetja e Kosovës, për afrimin e mëtejshëm të saj me KiE-në, në funksion të vendosjes së një dialogu konstruktiv me delegacionin e Kosovës në Asamble pasi angazhimi i Kosovës do të kontribuojë në drejtim të forcimit të standardeve demokratike në vend, dhe forcimit të paqes dhe sigurisë në rajon.
Në përfundim të takimit, Kryetari i delegacionit Shqiptar në Asamblenë Parlamentare të Këshillit të Evropës, Ervin Bushati, në emër të Kryetarit të Kuvendit të Shqipërisë, e ftoi zyrtarisht Presidentin Nicoletti për një vizitë zyrtare në Shqipëri e cila u pranua me kënaqësi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.